Diaranson, 7 di september, Minister Ursell Arends a reuni cu diferente criado di bestia na Aruba.
Durante e encuentro aki e criadonan a vocifera nan preocupacion unda a toca diferente topico manera cacho riba caya cu ta ataca nan bestia, problema di hortamento di bestia, manera cabrito y con pa haci entre otro registracion na DLVV mas facil y accesibel.
“Nos ta contento di por a sinta awe cu e criadornan di bestia na Aruba”, Minister Arends a cuminsa ta bisa. “Ta gradici nan tambe pa organisa nan mes pa trece nan preocupacionnan dilanti cual ta duna nos un bista di kico e problemanan cu nan ta enfrenta ta y tambe pa wak unda por brinda cooperacion. Como ministerio sigur nos lo bay haci nos maximo esfuerso pa bin cu solucion nan concreto pa e sector aki cu ta aporta na siguridad di cuminda na Aruba”.
A palabra cu lo sigui reuni cu e grupo y atende cu e preocupacionnan den coordinacion cu DLVV (Santa Rosa) pa yuda trece solucion structural.Ministerio di Naturalesa ta aplaudi tur criado y cunukero cu ta aporta na Aruba su sector primario y nos comunidad henter, pues ta brinda cooperacion di ministerio caminda cu por.
