Tur loke ta tumando luga ultimo tempo den Gobernacion ta lanta hopi pregunta cerca ciudadanonan. Asina tin decisionnan ta wordo tuma, y poco despues ta hala atras riba esakinan. Esey a sosode den e caso di VWO San Nicolas.
Dialuna den dia docentenan di Colegio San Nicolas a haya informacion di un decision tuma door di Minister di Enseñansa Rudy Lampe, cu ta cera VWO 3 San Nicolas pa motibo cu no tin hopi studiante. Esaki no a cay den agrado di docente y mayornan, kendenan mesora a cuminsa un campaña pa recauda firma cu a duna su resultado positivo momento cu el a yega den man di Parlamentario Howell.
Por a lesa riba un post di e Parlamentario cu mayornan a aserca su persona pa interveni den e decision tuma aki apenas dos siman prome cu scol a cera su portanan. El a bisa: Ora cu sea ken kita algo of mishi cu algo di pariba di brug (San Nicolas) di mes bo ta haci mi curason dolor y mi ta bay sali na defensa si mester …”
Ta parce cu e bos di Howell, of su partido, ta pisa mas cu esun di Lampe y su partido RED. Un poco mas cu un dia despues cu e decision aki a bira conoci, a pone presion riba e mandatario encarga cu Enseñansa te cu esaki a hala atras riba su decision pa cera VWO di Colegio San Nicolas. E propio Parlamentario a publica esaki tambe, “gradiciendo” Minister pa su “cooperacion” pa anula su decision.
Minister Lampe ta den un situacion, unda cu e atakenan riba dje ta bini di tur banda pa su decisionnan incomprendibel relaciona cu mundo di Enseñansa. Asina tin por ehempel e hecho cu e no ta papia palabra cla si ta bay cera SPO Sta Cruz y Savaneta. Ademas di esaki, tin problemanan na entre otro Un Paso pa Futuro, TraiMerdia y Comision di Docentenan cu ta malcontento cu falta di siguridad na scolnan. Eseynan ta apenas algun di e problemanan cu ta reina den mundo di Enseñansa.
