E intencion no ta pa amplia e facilidadnan pues lo no construi. Gerencia di The Mill Resorts a admiti di tabata rosando un pida tereno pero tin di haber cu hacimento di limpiesa, cu nan no a haci pa hopi tempo. Lamentablemente nan “Shoco Radar” no a funciona debidamente, locual a pone cu nan a dicidi pa mesora para e trabounan aki. Mirando e accion rapido aki, probablemente e caso sumario aki dos siman tampoco lo no tin sentido mas.
Manera ta conoci, ayera Aruba Birdlife Conservation a entama un caso sumario contra Gobierno y Mill Resorts NV, relaciona cu rosamento di tereno protehi. Corte a bay di acuerdo cu un “orde maatregel” pa para tur trabou mientras e caso no a tuma luga ainda, cu un dwangsom te cu 5 miyon florin.
Sinembargo, ayeranochi caba nos tabata den contacto cu gerencia di The Mill Aruba cu a indica cu for di antayera a para tur actividad, ora cu a cuminsa cu critica riba red social. Locual e actividad tabata un accion di limpiesa pasobra e tereno ta sushi.
Remarcabel ta cu ta bisa cu e tereno ta protehi, pero ta pertenece na Mill Resorts desde aña 1989 caba. Cu e cambionan ta pone awo cu doñonan di tereno mester bay tene extra cautela ora ta haci nan mesun tereno limpi den futuro, pa presencia di neishi di parha of otro bestianan.
