SEPPA ta invita tur hende pa bay analisa un rato, e diferente departamentonan cu ultimamente a bay over den un stichting. Durante e encuentro di Minister di enseñanza y maestronan riba DPS cu e Stichting, e minister a trece comparacion. Aki a papia hasta di por ehempel un SETAR, un WEB, kendenan a converti den un empresa estatal 100% di gobierno. Pero ta papiando di empresanan cu ta genera entrada, cu por yama nan minanan di oro. Pero den e caso di enseñansa den un stichting pa scolnan publico, den ki forma bo kier pa e hendenan aki genera placa pa por subsisti. E ta bon cla awe, e mensahe cu nan a ricibi cu a dun’e, cu en todo caso, nan como docente y no docentenan, no ta dispuesto pa bay drenta den guera di ningun fundraising di weekend, unda cu tin cu pidi fundraising pa material, drechamento di scol, pero al contrario, para loke nos constitucion ta papia, cu ta responsabilidad di un pais pa por brinda un enseñansa na nivel halto y no pas’e over pa ningun stichting y school bestuur. Mescos cu a trece na discusion na e gobierno actual aki tambe, cu eyfo, tin un limitacion hopi grandi na profesionalnan cu kier bay dedica nan mes voluntariamente, na diferente directiva di diferente fundacion, cu tur e riesgonan. Esaki lo bay bira e problema tambe cu e scolnan tambe lo bay pasa aden. Sin descarta cu tin profesionalnan na Aruba cu lo ta dispuesto, pero no ta asina manera cu e ta papia.

Di un otro banda tur fundacion na Aruba ta den incertidumbre, con e subsidio lo sigui den futuro. No lo kier conseha ningun ni docente, ni esnan cu no ta docente pa bay over den un stichting, di cual cu te na e momentonan aki no ta mucho cla mes, pasobra ainda no ta cla, e statuut con e ta hinca den otro, ainda no tin un sociaal statuut, caminda cu ta hinca e posicion huridico di e hendenan. Pero di un otro banda, tampoco e ta contesta e hendenan, si nan bay ter beschiking, manteniendo nan ambtenarenschap, kico ta e condicionnan cu si nan ta bay traha bao di e stichting nobo eynan. Locual cu e no ta bisa ta cu ta hopi dificil, pa despues cu e ambtenaarnan aki bay traha na disposicion di e stichting, pa bay bek den cualkier otro departamento di e aparato publico. E posibilidad eynan ta completamente nulo.

 

Causando duda

Esaki sigur ta causando duda, pasobra den tur e presentacionnan e trahadonan ta keda pidi, cu nan kier tur cos cla riba papel, pa prome cu papia di bay mento over. E duda na e momentonan aki ta asina grandi caba, cu e trahadonan, al contrario kier laga sa na e gobernantenan, tanto esnan cu ta riba nivel di gabinete, como esnan na nivel di parlamento, cu nan no ta di acuerdo pa comberti DPS den un stichting. Si esey ta bay sigui cu e plannan, nan no ta dispuesto pa bay over tampoco. E ora naturalmente e pregunta ta keda, kico e aparato ta bay haci cu un cantidad grandi di docente y no trahadonan, cu no ta bay over y e pregunta ta, e aparato publico lo bay carg’e bek?

 

Con ta considera e reunionnan

Magali Brito a comenta ta keda na e minister y como Gobierno pa evalua. Pero si por wak tur informacion cu el a duna te na e momentonan aki, bo ta keda haya e mesun mensahe, e mester por evalua si e ta riba e caminda corecto of no. A keda puntre cua ta e estudionan cu el a laga haci, cu ta indica cu e opcion cu ta tumando ta esun di miho y e estudio riba otro opcionnan cu ta wordo duna, si nan ta presente. E ta simplemente contesta cu esaki a keda como e miho opcion. No ta para ningun caminda unda e estudionan ey ta y ta sigur cu no tin ningun estudio, pasobra a informa na diferente departamento cu ta duna conseho riba e terenonan aki. A acerca diferente representante di gobierno riba e tema aki pa wak kico y con e discusion aki a bay. No tin nada te ainda. Na e momentonan aki, si e sigui e direccion aki, e ta bay crea mas frustracion bao di e trahadonan y e mes ta bay lanta e trahadonan aki contra un plan cu e ta bin cun’e, Brito a bisa por ultimo.