Diahuebs mainta trempan pueblo a haya otro golpi duro, ora cu SKOA a participa oficialmente, cu placa di scol ta aumenta pa 400 florin. Nan a argumenta cu cos a bira caro y cu for di 2016 e placa di scol a keda mesun cos.
Parlamentario pa fraccion di AVP, Mike de Meza, entre otro a mustra ta unda pais Aruba ta bayendo cu gabinete Wever-Croes, cu a demostra pa cinco aña caba, cu pueblo no ta bin na prome luga.
”Ta unda e pais aki ta bay cu gabinete Wever-Croes? Cuanto castigo y abuso ainda pueblo tin cu soporta na man di un gobierno cu no ta interesa den bienestar di su pueblo pero solamente ta percura pa sirbi interes di famia y amigonan.
Memey di un crisis grandi, caminda den presupuesto 2023, Gabinete Wever Croes a sigura pueblo caba cu e cosnan lo bira mas caro, cu aumento di BBO na 7% mientras cu ainda tin mas medida cu tin cu wordo introduci.
Pa 2023 ainda gobierno tin cu dicidi kico e lo haci cu BTW ya cu ta e propio Minister di Finansa, Xiomara Maduro, a anuncia cu aumento di BBO ta solamente e preparacion pa introduccion di BTW, indicando cu pueblo por spera mas medida.
Pueblo ta cansa y bashi pero for di mesun pueblo den crisis aki, gobierno kier bay saca entre 150 pa 170 miyon florin otro aña, cu lo sigui aumenta e crisis financiero cu pueblo ta luchando cu ne pa casi cinco aña caba.
Gabinete Wever-Croes no tin un vision pa yuda pueblo, al contrario ainda tin mas medida cu no ta introduci ainda, cu lo drenta na vigor na inicio di 2023, pues e situacion lo bay bira ainda mas dificil pa tur hende.
Ora cu nos papia, hopi ta kere cu ta politica nos ta haci pero awor pueblo ta sinti en carne propia, e falta di sentido humanitario di un gobierno di MEDP y RAIZ, cu simplemente no ta tene consideracion cu sufrimento di nos pueblo.
Nos di AVP a taha pueblo na varios ocasion den pasado cu MEP tin ningun vision y ta recori solamente na medida, persigui oponente politico y enrikece solamente nan famia!
Awe pueblo ta sinti esaki tur dia, ya cu gobierno no tin algo pa ofrece comunidad pero ta core grita cu lo bay aumenta salario minimo sin cu a hiba dialogo cu sector priva, sin cu a busca conseho cerca SER, pero ta grita algo pa kere c’un biaha mas pueblo lo cay pa mas promesa falso.
Con un famia cu tin dos of mas yiu, cu ta biba riba minimumloon por bay saca un suma di 800 florin of mas, pa paga schoolgeld mientras cu tanto Prome Minister Wever-Croes como otro ministernan di su gabinete, a sigura mayornan cu lo no permiti aumento di schoolgeld.
Sinembargo Prome Minister y su gobierno ta campeon den haci promesanan falso ya cu mesun cos a ser sigura na pueblo cu lo drecha e situacion financiero di gobierno, sin cu mester tuma medida.
Awe pueblo ta hogando den e medidanan, cu mas na caminda pa 2023, un pueblo sintiendo e peso di un aumento di gasolin, a pesar cu mesun gobierno aki a priminti pueblo na 2017 cu lo busca gasolin barata pa alivia e situacion pa pueblo.
Awendia ta gobierno di MEP-RAIZ ta gana miyones riba custia di pueblo, cobrando accijns riba gasolin for di 2018 caba pero pa pueblo tin NET NADA.
Ta mesun gobierno aki, caminda tanto prome minister como Minister di Energia, Glenbert Croes, a sigura pueblo cu prijs di awa y coriente lo no subi pero nan a para mira man crusa, con varios cas a ricibi cobransa cu a bira dobel fin di luna y sin cu nan a haci algo.
Un biaha mas, ta unda e pais aki ta bay cu gabinete MEP-RAIZ di e forma aki, “ Parlamentario Mike de Meza a declara.
