Entrante dia 1 di september 2017, oficialmente Instituto Alarma y Siguridad Aruba, funda tempo di Minister Rudy Croes, ta stop di existi. Na su luga a funda Migracion Aruba, cu Gerald Vingal na cabes. E departamento aki lo atende tur asunto di migracion na aeropuerto y wafnan, mientras cu Warda nos Costa ta pasa tambe bou di nan.
Relaciona cu e cambio aki, desde awe dialuna e trahadonan na Servicio di Migracion na Aeropuerto a cuminsa bisti nan uniform nobo, cu ta basta parecido na esun di nan coleganan di US Customs and Border Protection (CBP). E empleadonan di Migracion a cambia camisa manga largo blauw cla pa camisa manga cortico blauw scur y cu carson blauw scur. E strepinan riba nan schouder cu tabata di color di oro tambe a cambia pa color di plata.
Mester menciona cu e trahadonan ta masha contento cu e cambio aki, asina por a deduci for di nan mesun publicacionnan riba red social, mustrando nan satisfaccion pa e uniform nobo pero tambe pa e cambio den nomber y funcionamento di e departamento.
A introduci e ofishi di ambtenaar di Inmigracion dia 19 di maart 1969 bou di Cuerpo Policial di Antias, den e departamento “Sectie Vreemdelingen Politie”. Dia 1 di september 2002 a los e departamento for di Cuerpo di Polis y a inclui den e organisacion nobo DINA (Directie Immigratie en Naturalisatie Aruba). Cuater aña despues na 2006 a elimina DINA y a crea IASA (Instituto Alarma y Siguridad Aruba) unda a aloca Radar 911, Warda nos Costa y Servicio di Inmigracion.
Aunke cu e intencion inicial tabata pa dia 1 di januari 2017 crea un solo instancia, Migracion Aruba cu dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa, toch no a logra keda cla te awor dia 1 di september cu e cambio ta drenta na vigor.
Te awor Servicio di Inmigracion ta consisti di mas o menos 60 empleado mientras cu Warda nos Costa ta conta cu mas o menos 17 empleado.
