“Aunke cu a nombra Marilynn Dirksen como director suplente di Directie Infrastructuur en Planning (DIP), no ta sigur ainda ken of pa ki tempo lo tin un director fiho bek. Comunidad di Aruba mester y merece pa e servicio na DIP por drecha awo”, asina Parlamentario Alvin Molina di e fraccion di MEP a indica awe. E parlamentario cu ta sostene coalicion tin hopi critica riba e servicio di DIP, pero awo ta mira luz na horizonte.
Den un reunion recien cu Marilynn Dirksen el a indica cu e tin suficiente tempo trahando na Directie Infrastructuur en Planning (DIP) pa por a mira kico ta causa cu e servicio di e departamento no ta funciona optimal. El a enfatisa e importancia pa e personal ta bon ekipa y motiva pa por haci nan trabou, cual ta un di e puntonan primordial cu Dirksen ta trahando riba dje. Su maneho pa mehora funcionamento di DIP ta kedando cla, na opinion di e fraccion di MEP den Parlamento di Aruba.
A palabra cu Dirksen cu den e prome siman di september 2023 e lo haci un presentacion na Parlamento di Aruba pa actualisa informacion riba e retraso cu tin na DIP, kico a causa esaki y su plan pa drecha e servicio. Den e presentacion Dirksen lo mester splica e organo mas halto di nos pais, ta den ki estado Haime Croes a bay laga DIP y kico el a haci for di mei pa awo y kico ta su plannan pa futuro. Lo depende hopi di e reunion ey, cu e por conta riba sosten di Parlamento di Aruba pa sigui ehecuta su plan y keda den e funcion di director, cu e ta ocupa awo den forma temporal, mientras ta investiga Haime Croes.
Parlamentario Alvin Molina a gradici Minister President Evelyn Wever-Croes pa duna oido na su peticion pa mete mas direct cu mando di su Departamento di Infrastructura. “A bira tempo pa ciudadano- y comerciantenan por mira adelanto cu nan proyectonan y cu nan soño lo por bira un realidad”, asina Parlamentario Molina a expresa. Mester menciona cu no ta prome biaha cu e mesun parlamentario aki ta expresa critica pisa contra maneho di DIP. Cada biaha atrobe e critica ta keda ey pasobra ta parce cu ningun minister kier responsabilisa nan mes politicamente pa e mal maneho eyden. Por lo menos awo Prome Minister a cuminsa saca cara y acepta cu si e no haci nada, cu e lo carga e culpa politico pa tur locual ta sosode den DIP.
E locual no ta scuchando nada di dje mas, ta e investigacion riba Haime Croes, kende nan a manda cas na luna di mei ultimo. ya ta tres luna, pues e 12 simannan maximo cu por investiga un empleado publico, a pasa caba. Gobierno mester tuma un decision awo, sea ta cana e caminda disciplinario, si a haya algo den su file of si ta haci un keho penal contra dje na Landsrecherche, si acaso tin base pa esey. Pero ta imposibel cu ta keda keto y cu man crusa mientras cu e departamento ta keda den “limbo” sin por mehora y drecha servicio y maneho.