E midimento di poder entre e partidonan di coalicion MEP y Raiz ta continua, awo den Parlamento di Aruba. Raiz a pidi, di prome dia caba, cu lo manda yama Minister Glenbert Croes den parlamento pa duna cuenta y rason di e contract entre Eagle LNG. Vice-presidente Raymond Kamperveen a bisa cu Minister Croes a mara nos pais pa 20 aña largo sin pidi permiso den Conseho di Minister, sin atende den coalitieberaad y sin bay parlamento.
El a boga pa bin cu un investigacion y si mester hasta un encuesta parlamentario riba e asunto. Pero, Presidente di Parlamento a pasa riba dje t’e fo’i Hulanda, cambiando e reunion publico den un “bijeenkomst”. Ayera nochi e vice-presidente a bolbe draai e invitacion bek, pasobra den ausencia di e presidente, ta y mes ta manda!
Den su calidad como vice-presidente di parlamento, Raymond Kamperveen a manda yama un reunion publico cu caracter di urgencia, cu un solo punto riba agenda, cu ta e contract entre WEB Aruba NV y Eagle LNG y e proceduranan cu a sigui pa loke ta e contract y e posibilidad di cambia for di Heavy Fuel Oil pa hidrogeno. Pa e reunion aki a exigi presencia di Minister di labor, energia y integracion, Glenbert Croes, pa e ta den parlamento pa asumi responsabilidad pa e contract multimiyonario cu el a permiti WEB firma.
E reunion aki ta a base di un peticion haci di parti di e fraccionnan di AVP, MAS y Accion 21 riba dia 8 di december y tambe di parti di fraccion di MEP dia 10 di december ultimo. Te asina leu, esaki ta un Openbare Bijeenkomst riba e mesun tema aki mirando cu e presidente Edgard Vrolijk ta den exterior. Ta p’e motibo aki Kamperveen a pidi Griffier pa pone esaki riba agenda den cuadro cu articulo 8 di Reglement van Orde.
Loading…
Reload document 
Open in new tab E parlamentario tabata hopi skerpi den su ponencia riba e hecho di firmamento di e contract y ta p’e motibo aki mes ta manda yama un reunion publico pa trata esaki. E diferencia entre un OV y OB ta cu den e reunion publico (OV) por presenta amienda, mocion y hasta por baha e minister di su puesto, si mayoria ta desea esey. Pero den un bijeenkomst nada di esaki ta posibel. MEP ta teme cu si un solo miembro di Raiz para duro, lo por tuma decisionnan fastioso pa coalicion, incluyendo caida di e gabinete apenas algun siman despues di nan huramentacion.
Te asina leu cu ta conoci, lider di fraccion di Raiz, Misha Raymond lo ta yega awe tardi fo’i Hulanda pa asina discuti den un partijaad pa dicidi un ke otro, relaciona cu e mesun tema aki. Pa Raiz e asunto aki ta di principio y si acepta esaki, anto pa e siguiente 20 añanan Aruba lo no por yega na energia renoba, bon pa medio ambiente y barata. Gas ta mescos petroleo, un combustibel cu mundo henter ta distanciando di dje. Mas hende lo desea di bay na energia alternativa manera solo, biento y Raiz mes ta boga pa hydrogen. Pero cua cu kier scoge, nada ta posibel den e siguiente dos decadanan.
Loading…
Yegada di minister-president awe fo’i Merca y demas parlamentarionan fo’i Hulanda lo marca futuro si gabinete Wever-Croes II. Si gobierno cay, lo ta di dos gabinete Wever-Croes cu ta cay na caminda. E prome tabata entre MEP-POR-RED cu a cay pa falta di integridad den POR. Awor mesun situacion di integridad ta riba mesa atrobe, pero e biaha aki den MEP pa e deal cu Eagle LNG, den cual varios cara prominente di MEP y famia Croes ta envolvi den forma directo.
Loading…
Raymond Kamperveen a bisa e siman aki ainda den Enfoke: Boso mester realisa cu boso a divorcia (referi na POR y RED) y cu awo boso tin un otro partner (Raiz) y cu boso no por sigui trata boso partner mescos con b’a trata bo partnernan chikito den pasado. Cu e palabranan fuerte aki Kamperveen ta subraya cu “nos no ta nan” y cu Raiz si lo no tuma tur cos manera RED y POR kisas si a acepta den pasado.
Entretanto riba red social ta nota cu coordinadornan di MEP den Cocolishi a cuminsa ataca nan partner Raiz pisa, indicando cu e relacion a bay di “ruman” pa “enemigo” masha lihe mes.
