Ta Dios mes ta nos refugio y nos Fortaleza, ta E so por sostene nos.
Den Juan Capitulo 15:7 ta para skirbi: “Si boso keda den Mi y Mi palabranan keda den boso pidi tur loke boso kier y esaki ta haci pa boso. Den esaki ta glorifica Mi Tata , cu boso ta carga hopi fruta y asina ta demostra di ta Mi discipelnan.”
Tur locual nos pidi Dios den nomber di Cristo Hesus E ta duna nos.
Aunke cuanto pronostico negativo por lanta tocante di e aña venidero, sa cu nos oracion dilanti di Dios por cambia nos situacion, basta nos pidi cu fe y gradici Dios pa locual cu nos ta bay ricibi.
Den 2 Cronicas Capitulo 7:14 y 15, Dios mes ta siña nos con pa sali for di situacion dificil y bin bek riba pia.
Dios a duna nos e autoridad, palabra y sabiduria pa acerca su trono di gracia y ricibi gracia y pronto auxilio.
Locual ta pasa ta cu hende ta mas pega na pronostico di bruheria y di spiritista di fama en bes di hende ta pega na Dios Todopoderoso, Esun cu no ta faya.
Pero e aña venidero nos ta para firme dilanti di Dios pa nos mira cambio, pasobra ora Dios priminti algo, nos mester ta obedecido y sigui su palabra pa nos mira su bendicion.
Ta solamente Dios por cambia nos lamento den Baile. Ta solamente Dios por cambia nos tristesa den alegria.
Dios por habri porta di bendicion pa trabao por habri y riba cada mesa den cada hogar lo tin pan.
Mateo Capitulo 21:22 ta para skirbi: “Tur locual boso pidi den oracion cu fe boso lo ricibi.”
Juan Capitulo 14:13 ta para skirbi: “Y tur loke boso pidi den Mi nomber esey lo Mi haci, p’e Tata ta glorifica den e yiu. Si boso pidi algo den mi nomber lo Mi hacie.”
1 Juan Capitulo 5:14 ta para skirbi: “Y esaki t’e confiansa cu nos tin su dilanti, cu si nos pidi cualkier cos conforme su boluntad, E ta tende nos. Y si nos sa cu e ta tende nos den tur loke nos pidi, nos sa cu nos tin e peticion nan cu nos a pidi di dje.”
Asina ta cu nos sa tur locual ta necesario, pa nos por tin un aña bendiciona, sin ningun duda, pasobra locual ta imposibel pa hende ta posibel pa Dios.
Locual Dios kier ta pa nos humilia nos mes haci oracion. Busca cara su cara y bira fo’i nos mal caminda. Dios lo scucha fo’i shelo y sana nos tera.
Esaki ta Dios su formula di bendicion e no tin otro formula cu no ta esun di obediencia completo na su palabra, pasobra asina nos lo yega na e bendicion cu Dios tin pa nos.
Nos ta spera un aña bendiciona den presencia di Dios. Nos yiunan lo ta contento, pasobra Dios a bendiciona nos y Dios no a lubida riba nos.
Dios duna nos un aña 2022 bendiciona!!!
Pastoor Marcel Balootje
