Awe diamars pa 12:00pm, Servicio Meteorologico di Aruba a emiti un aviso pa calor excesivo, valido di awe 12:00pm te cu diabierna awor pa 6:00pm. Ta premira cu presion abou causa pa horcan Maria lo produci un biento zwak di noord te noordoost.
E caracteristica aki lo continua pa motibo cu horcan Maria lo keda den bisindario di noordoost di Caribe. Temperatura maximo di diamars pa diabierna lo varia di 33 pa 36 grado Celsius, mientras cu e porcentahe di humedad lo ta entre 80 te 89% cu sin duda lo contribui na un indice di calor (temperatura aparente) rond di 40 te 44 grado Celsius. E calor y humedad halto lo no baha mucho anochi cu temperatura bahando solamente te un minimo di 27 grado…esaki lo aumenta e peligro pa hendenan cu no por haya un luga adecua pa refresca nan curpa.
Calor excesivo ta e asesino di tempo nr. 1. Hende mester ta prepara pa e peliger cu calor excesivo ta ocasiona. Mucha chikito, hende grandi y hende cu problema di curason ta esunnan mas vulnerabel. Limita actividad pafo di cas den oranan trempan di mainta of ora solo baha. Si bo tin un airco cu ta funciona, uze of a lo menos habri bentana pa laga aire pasa y circula.
Ta adverti ciudadanonan pa tuma accion di precaucion. Un aviso pa calor excesivo ta nifica cu ta spera un periodo di temperatura halto. E combinacion di temperatura y humedad halto lo combina pa crea un situacion den cual lo por presenta enfermedad causa pa exposicion prolonga na temperatura halto. Bebe hopi likido, keda den camber cu airco y purba keda leu for di solo.
