Recientemente Alberto Klabér di Brazil Taekwondo Stichting a reuni cu señora Lila de Cuba y su yiu Ryan Arends na 1692 NW 82 Ave. Doral, FL 33126. Ph: 305-591-2772 e-mail:
[email protected] tocante di e continuacion di e Aruba Caribbean Cargo Taekwondo Cup.
Lila de Cuba y Ryan Arends a confirma cu nan ta bay sigui sostene Brazil Taekwondo Stichting cu e di 10 evento y cu nan ta bay sigui haci esaki tur aña tambe. Alberto Klabér a keda contento, pasobra Lila de Cuba tin su negoshi na Miami y e ta inverti den deporte di Aruba pa 10 aña caba y e campeonato ta carga nomber di su compania na Miami.
Lila de Cuba a confirma cu pa e di 11 edicion e ta bay bin Aruba sigur pa entrega premio na tur e ganadornan. Lila de Cuba semper a pone Dios su dilanti y semper a kere den e bon trabou y e bon hendenan cu tin den Brazil Taekwondo Stichting, esey tabata su palabranan.
Aruba Caribbean Cargo Taekwondo Cup lo bay ta diasabra dia 30 di September den Centro di Bario Brazil y ta e ultimo clasificasion pa Best of the Best 2017. Despues di e campeonato aki ta bay scoge tur e atletanan cu a wordo selecta pa bringa na e di 22 Best of the Best cu ta dia 11 di November y Surinam a confirma cu 22 atleta caba, Chile, Corsou, Venezuela y Merca tambe a confirma.