Hendrik Tevreden, president di MEP, den un conferencia di prensa di MEP na e sede na Santa Cruz a bisa cu politica personal no por prevalence riba interesnan general di un pais. Awe nos a ripara cu Partido MEP a haya un carta di Daphne Lejuez, riba su posicion, y cu a cay cerca nan como sorpresa pa motibo cu nan tabata na mesa di negociacion.
Tevreden a bisa cu den politica semper mester trata di yega na solucion y evita interupcion.
El a lesa e parti final, pa ilustra cu Lejuez mes ta esun cu a tuma su retiro for di Partido MEP, El a cuestiona e posicion dualistico di e Parlamentario, kende ta papia di e bon trabou cu MEP ta haciendo pero a dicidi di declara su mes independiente. Ehempel di nan duda ta cu tabata sinta na mesa, scuchando otro, intercambiando pensamento, tratando di yega na otro, y el a simplemente lanta y declara su mes independiente.
Presidente di Parlamento a bisa cu e ley di desperdicio cu Lejuez tin problema cun’e, ta algo cu fraccion di MEP a pone bon cla cu e ley tin cambio pa haci riba nan. Hasta e mesun Minister a entrega dos nota di cambio, fraccion di MEP tin un amienda cu cinco cambio den dje, pa cual e ta bisa cu no ta corecto pa expresa cu e ley aki no ta debidamente scrutina. Pero tambe a sinta cu representantenan di diferente sector di comunidad. P’esey door di anuncia un retiro sin comunica cu fraccion, ta un actitud infantil cu ta pone nan puntra nan mes si e ta digno pa keda cu e stul cu e tin den Parlamento.
El a finalisa puntrando sra. Lejuez ki dia fraccion di MEP, partijraad di MEp, Parlamento a cuestiona su postura riba e tema menciona. Esaki pasobra, segun e ta bisa, sra. Lejuez tin basta tempo sin acudi na reunionnan. Ki dia fraccion di MEP no a scrutina e ley manera menciona den e conferencia di prensa. “Mi ta kere cu Aruba merece contesta riba e preguntanan aki, pero mas importante mi ta kere cunos sostenedornan tambe merece contesta riba e preguntanan aki,” president di MEP a bisa.
El a cuestiona tambe e hecho cu Lejuez a papia di sirbi interes general y publico y prome cu interesnan personal. P’esey el a puntra su ex colega cual interes e ta sirbiendo, si ta interes general of personal. Si e tabata sirbi interes general, e lo pone den un amienda, discuti esaki na mesa, den coalitieberaad. Tur e oportunidadnan aki e tabatin, y nan di MEP a haci uzo di dje cu a haci cu e ley no a pasa ainda. Awo Lejuez, e ta bisa, a bay den un conferencia di prensa pa anuncia su posicion.
Rocco Tjon
Lider di fraccion di MEP den Parlamento, Rocco Tjon, a bisa cu como lider di fraccion nan no ta reconoce nan mes den e ponencianan di Lejuez. Y ta lamenta cierto expresionnan cu e Politico a haci den su conferencia di prensa. E no por bisa otro cu interes personal a prevalece riba interes general y bienestar di pais Aruba.
El a refuta cu parlamentarionan ta wordo silencia, intimida pf presiona pa tuma cualkier decision. Den pasado caba tabatin leynan cu no a pasa. Tin democracia den MEP y pesey ta respeta su decision, aunke cu no ta di acuerdo cu su motibonan.
E mes a combersa dos siman pasa cu Lejuez despues di un publicacion riba Facebook. E no a haya e impresion cu e tabata sinti su mes incomodo den e fraccion. El a keda di informe hasta di e tres puntonan di preocupacion cu e tabatin ainda. P’esey e ta bisa cu esaki no ta e motibo real pakico sra. Lejuez a distancia su mes di fraccion y Partido MEP.
Siman pasa tabatin un decision cu a keda tuma den comision central contra un Parlamentario. Esey tabata momento cu Lejuez a bisa cu e ta diferencia di opinion cu fraccion di MEP. El a bisa cu e ta haya cu Sevinger por representa Aruba. El a dicidi di sali di chatgroup di fraccion di MEP. Despues cu a wordo hinca atrobe, el a sali bek. Esaki despues di a distancia su mes di MEP riba e punto ey. E ta lamenta cu Lejuez ta para pa politica nobo, y ta tuma un posicion asina. Un dia prome ainda a puntre kico e ta bay haci y su contesta tabata cu e lo informa nan despues.
E ta lamenta cu nan a haya sa di e decision aki via di rednan social. Y lider di Partido a haya sa di esaki via di un carta.
Pa finalisa, el a bisa cu nan tin informacion cu sra. Lejuez ta bay afilia su mes na otro partido.
Prome Minister
Lider di Partido MEP y alabes Prome Minister den e conferencia a bisa cu e tambe a keda sorprendi cu e decisiondi Daphne cu el a bin tende di dje via di un carta cu el a haya for di deurwaarder den oranan di merdia. E decision tabata un sorpresa pa motibo cu e tabatin contacto varios biaha e ultimo dianan aki cu e Parlamentario.
Den e ultimo reunion siman pasa hasta el a pidi pa intermedia pa cu su preocupacionnan cu e Ley di Serlimar. Pero tambe el a keda sorprendi pasobra Lejuez semper a bisa cu ora e bay, en o ta bay cu e asiento di MEP. Pesey e ta bisa cu e decision aki ta un sla pa partido MEP.
Pero e decision no ta cambia den nada cu e meta pa sigui sirbi interes general y trece stabilidad pa cual e gobierno di MEP, POR y RED lo sigui.
E mandatario ta bisa cu ta pone interes di Aruba na prome luga. Pesey si tin Aruba na curason, ta busca solucion pa preocupacionnan. Lejuez a indica cu e lo kier sigui sostene e bon maneho di Gobierno y ta keda na dje pa demostra esaki, pone integridad y e ser humano na prome luga den e maneho na Aruba.