Polis Spaño ta buscando Hugo Carvajal

Polis Nacional Spaño a bisa diaranson cu nan ta buscando e exresponsabel di inteligencia militar di Venezuela, Hugo “El Pollo” Carvanal, dianan despues cu varios medio local, entre nan e agencia EFE, a bisa cu e Audiencia Nacional lo a acorda pa extradit’e pa Merca.

Cavajal, aliado di e fayecido lider socialista Venezolano, Hugo Chavez, ta wordo pidi pa autoridadnan Mericano pa un supuesto delito di narcotrafico.

El a nenga e acusacionnan

Despues cu varios medio Spaño entre nan El Pais, a informa cu e tabata desapareci, Polis Nacional a confirma cu nan ta buscand’e, pero no por a specifica ki ora nan a cuminsa busk’e of e motibo pa esaki. Su abogado no tabata disponibel inmediatamente pa duna comentario.

A detene Carvajal na april riba peticion di autoridadnan Mericano pero e Audiencia Nacional inicialmente a descarta su extradicion y a lag’e den libertad.

Autoridadnan na Washington a bisa cu nan ta kere cu Carvajal por tin informacion incriminatorio riba e presidente di Venezuela, Nicolas Maduro.

Consul General na Aruba

Hugo “El Pollo” Carvajal tabata consul general di Venezuela na Aruba y na 2014, a wordo deteni pa tres dia a base di cargonan imponi pa Merca di droga.

Pero gobierno Hulandes a dicidi cu nan kier evita un confrontacion diplomatico cu Caracas.

Formalmente Carvajal tabata tin inmunidad diplomatico manera cu el a yega e isla, na momento cu el a asumi como consul.

Despues el a bula bay bek Venezuela, unda cu nan a ricibi’e cu brasa habri como un heroe pa e gobierno socialista.

Pero despues di a retira su sosten for di Maduro door di a anuncia di ta para tras di Juan Guaido como presidente interino di Venezuela den un video, pidiendo pa deroca e presidente, e ex spion di 59 aña, a huy for di Venezuela den un boto pa Republica Dominicana na maart y despues bulando pa Madrid na april.

Comments

comments