Riba 16 di april ultimo Parlamento di Aruba a tene un reunion publico dirigi riba e maneho di admision di Minister Glenbert Croes. E reunion aki tabata pidi pa e fraccionnan di MAS y AVP.
Na inicio di e reunion, mesora lider di fraccion di MAS a pidi punto di ordo y di forma disgusta a bisa cu e titulo di e reunion no ta cuadra cu loke nan peticion ta indica.
Sinembargo, Presidente di Parlamento a duna di conoce cu e anuncio di e reunion publico ta indica netamente loke cu e parlamentario a pone den su prome peticion, asina parlamentario Ricky Hoek di fraccion di MEP a declara.
Marisol cu mocion di desconfiansa
Na momento cu orador number tres cu ta parlamentario Tromp a cuminsa duna su discurso, y a coregi Presidente di Parlamento riba e titulo di e reunion, el a hisa benta un mocion di desconfiansa contra di Minister di Labor, Energia y Integracion den sala di parlamento.
Hoek a agrega cu e intencion no funda di parti di MAS y AVP aki ta netamente pa kita e minister di su puesto, pa motibo cu den nan opinion personal e minister ta traha ineficiente y no transparente.
E minister en cuestion na varios ocasion a bin den sala di parlamento pa ‘openbare bijneekomst’ y durante tratamento di presupuesto 2024 a elabora amplio riba e tema. Pero nan no a presenta na tratamento di presupuesto.
E realidad tras di e mocion
Na punto dies di e consideracion di e mocion, MAS y AVP ta indica “dat de regering pretendeert dat integriteit hoog in het vaandel te hebben en dat deze minister alle algemene beginselen van behoorlijk bestuur en de integriteitsregels schendt.”
Bisando den corto cu e minister no ta integro. Aki un biaha mas e reina di gaslighting Tromp ta sconde tras di un mocion di desconfiansa pa asina pinta un minister malo, caminda cu e propio parlamentario Tromp tin algun caso riba su nomber unda el a kibra varios ‘integriteitsregels’ barbaramente.
Ambos partido MAS y AVP kier duna e impresion cu nan ta integro, siendo ambos ta persigui pa husticia, pa e casonan coruptivo. Mas ainda, Tromp ta e unico minister cuestiona den e WODC rapport pa su maneho di tereno.
Net nan, cu tin cu wak nan refleho den e spiel, kier firma un mocion di desconfiansa contra un minister cu a elabora abiertamente riba su maneho den sala di Parlamento.
E resultado di e votacion riba e mocion di desconfiansa a conclui cu 8 voto pro y 12 voto contra. Ta di lamenta con e politiconan di hopi aña di experiencia ta wak e splenter den wowo di e minister, pero no ta wak e balki den nan mes wowo, asina parlamentario Ricky Hoek a finalisa bisando.
