Dialuna mainta, durante conferencia di prensa, lider di partido Movimento Electoral di Pueblo (MEP), Evelyn Wever-Croes a tuma e oportunidad pa elabora riba e actividad di partido cu lo tuma lugar dia 30 di october na cede di MEP. E slogan di e evento aki lo ta; “Un Aruba Stabiel cu MEP”.
E presidente di partido, Ricky Hoek, a anuncia cu partido ta confia Evelyn Wever-Croes como nan lider pa e proximo periodo. Hoek a anuncia cu den durante un congreso di partido, lo oficialisa e anuncio aki.
Durante e evento lo tin varios actividad cuminsando cu un acto cultural y un show hopi bunita. Lo tin tambe un expo hopi interesante di e tres lidernan di partido.
Riba 30 di october lo bay tin e congreso di MEP cu ta un formalidad cu partido MEP ta cumpli cu ne cada pasa tanto tempo. Durante e congreso lo presenta e relatonan anual, e fundacion nobo cu ta e fundacion Nelson Orlando Oduber, miembronan di directiva y e hala femenino di MEP cu ta Forsa Femenino Grace, cu recientemente tambe a cambia di directiva y presidente, tambe lo tin e parti di reeleccion di lider.
Lo cera e anochi den un ambiente festivo cu e bandanan Delicious y Tsunami. Bar lo ta bon surti bou encargo di Fundacion formacion politico Nelson Orlando Oduber cu ta recauda fondo pa nan actividadnan. E fundacion aki ta esun cu ta yuda forma politiconan nobo. Cushina tambe lo ta bon surti y esaki ta den man di Forsa Femenino Grace cu tambe ta recauda fondo pa nan actividadnan.
Lider di partido MEP ta extende un invitacion cordial na tur nos votadornan, sostenedornan, tur lider di bario y Aruba en general pa pasa disfruta den famia, diadomingo dia 30 di october di 4:00 pm na Cede di MEP.
