Mayornan a haci denuncia na polis: A parti jello shots na fiesta di mucha

15220

Ayera diasabra anochi alrededor di 10:00pm a spacha un patruya di polis pa Siribana # 20-L pa un fiesta di mucha den cual tin bebemento di alcohol. Na yegada di polis a topa cu un mama disgusta para pafo di e fiesta pasobra nan a duna su yiu muhe menor di edad “jello shots” bebe, cu a causa cu e yiu a practicamente “pass out” den baño. E ta culpa mayornan di esunnan cu a organisa e fiesta di tabata personalmente presente y tabata sirbi muchanan alcohol durante e fiesta!

Polis a constata na e sitio cu e cas tabatin un cura grandi cu piscina den dje. E yiu a haci 17 aña di edad y a invita algun amigo y amiga pa celebra cu ne. De facto, esey durante e temponan aki no ta permiti completamente, pero pio ainda…pa promove consumo di alcohol bou di menornan di edad.

Tata y mama di esun cu a haci aña: Ambos ta para dilanti un denuncia oficial di otro mayornan na husticia. Nan ta keha nan di a permiti consumo di alcohol den fiesta di mucha. Mayornan a confia laga nan yiunan bay e fiesta pensando cu tin hende grandi pa tira bista. Nan nunca a pensa cu e mayornan di e cumpleañero mes lo parti alcohol na nan yiunan.

Ey a topa cu e tata di e cas, cu ta maneha e barnan di un hotel highrise. Obviamente e conoce alcohol y a percura pa e bar na cas ta bon surti cu tur sort’i bebida pa e invitadonan. Locual probablemente e no a conta cu ne ta cu cantidad di e invitadonan tabata mucha, o sea menornan di edad, mescos cu su yiu cu a haci aña diasabra.

E mama di e mucha muhe invita tabata yamando su yiu pa e bay busc’e na fiesta. E yiu no tabata contesta, pa cual e mama a haya esey masha straño mes. El a bay mas lihe ainda y ora a yega na e cas, a purba strob’e di drenta paden pasobra e no tabata invita. Ta comosifuera cu “tabatin algo di sconde” cu mayornan no por bin paden di e fiesta. Asina mes e mama a forsa te yega den e fiesta sin por topa cu su yiu.

Si el a bin haya un amiga di su yiu, cu tabata parce bebi y cu un lenga pisa a cont’e cu su yiu ta den baño. E mama a bay den baño y despues di warda basta, a dicidi di habri e porta y topa su yiu muhe di 15 aña benta na suela cu parti di su paña kita. El a bay den panico y ta na e momento ey mes el a yama polis tambe pa bin pone nan mes na altura di e fiesta aki.

Jell-O shot of conoci pa mayoria como “Jello Shot” ta un gelatin mescla cu alcohol consumi den forma di un “shot”, pues den un slok. E ta traha cu vodka y cualkier sorto di jello of gelatin. Ta traha e bebida aki den “shot glasses” of den cup di frio chikito of den baki di ijs. Tin biaha sa mescla e shot cu juice of otro alcohol cu sabor pa dun’e un extra smaak. E bebida ta masha popular pasobra e ta barata y facil pa prepara. E bebida ta existi desde siglo 14 caba pero a recobra popularidad y comerialisacion despues di aña 1980.

E yiu obviamente no ta corda nada. E sa si cu tata di e mucha cu a haci aña tabata pasa jello shots y bisa nan cu e ta manera un juice y cu e no ta haci nada. Otro muchanan a haya Hennesy pa bebe, cu probablemente nunca a purba den nan bida. Un dado momento el a sinti cu e ta marea y no ta sinti su mes bon mas. El a bay baño pa purba saca pero den e proceso no por a wanta su curpa mas riba pia y a cay na suela.

E mama a core hiba su yiu Hospital pa haci test mesora. A topa cu otro mucha muhenan eynan tambe cu a sali di e mesun fiesta. Un otro mama a conta e mama preocupa aki cu su yiu muhe a purba sali na panty y BH for di e fiesta pero nan a strob’e. Mucha muhe nan cu nan a pusha cu alcohol y cu a perde control completamente di nan mes den e fiesta.

Un otro mama a conta cu su yiu tambe a cont’e cu e tata di esun cu a haci aña mes tabata pasa parti co’i bebe y ora caba e mes tabata refill e bar tambe. E mama a conta cu e yiu a bis’e cu e mucha hombernan tabata haci nan burachi y purba kita nan paña. Tabata tira nan den pool y ora sali ta ranca nan paña for di nan curpa. Claro, tabata haci esey den grupo, pa uza forsa riba e mucha muhenan, tur menor di edad!

Hasta otro mayornan cu a yama otro awe, a haya di tende cu algun di e mucha muhenan a wordo hiba den camber, asumiendo cu a tene relacion sexual cu nan den e fiesta. Tur esaki mientras cu mayornan di esun cu a haci aña tambe tabat’ey y a permiti e bagamunderia aki sosode!

Varios mayor a core hiba nan yiu Hospital pa haci rape-kit pero a compronde cu no tin dicho “kit” actualmente na Spoedeisende Hulp pues no por test si a abusa di e mucha muhenan cu por uza como material di prueba den un caso penal.

Asina mes mayornan a bay ward’i polis di Playa awe pa entrega keho na Jeugd en Zeden Politie (JZP). Polis a scucha nan demanda y a pidi nan pa regresa mañan den dia pa por caba di procesa un ke otro. Nan ta demandando mayornan di e cumpleañero pa a permiti pa hinca nan yiunan den peliger na un fiesta na “cas di famia”. Mayornan di e victimanan menor di edad kier pa Fiscal baha cu man duro riba e practica aki, pa evita ripiticion.

Di otro banda, awendia mayornan no por confia mas di hiba nan yiunan na fiesta asina sin mas. Mester ta sigur na cas di ken e mucha ta bay fiesta, sigura cu tin un mayor presente, pidi pa su nomber y number di celular, papia cu ne ora yega..y si ta posibel, baha bo mes como mayor pa tira un bista riba e cas unda bo yiu ta bay fiesta. Si acaso bo ta sinti cu algo no ta bon, djis hinca bo yiu bek den auto y hib’e cas. Pasobra “mal ora” semper ta para na skina ey mes!