Un ciudadano preocupa a denuncia cu a topa cu documento-, formulario- y articulonan personal di turistanan exponi den un baki di sushi na un edificio comercial den Engelandstraat na Eagle. Ey tin un baki yena cu ED-Cardnan di Aruba Tourism Authority cu informacion personal di turistanan. Por a mira email, ocupacion como tambe unda nan lo a hospeda riba nos isla.
Ta trata aki di informacion confidencial cu, de facto, mester a destrui of deshaci di nan di un forma mas cuidadoso pa evita cu nan ta “slenter” riba caya. Por imagina cu den situacionnan asina aki, e procedura regular lo ta pa destrui tur material precisamente pa evita cu e informacionnan priva aki por “perde”.
Version di Aruba Tourism Authority
A.T.A. tin un proceso intensivo di con ta atende cu data, incuyendo den esaki, procesamento di carchi di imigracion. A.T.A. su proceso normal ta cu e ta “shred” (destrui) e carchinan di imigracion y ta hiba nan dump ora e incinirator ta cendi. A.T.A. tambe tin un recycle bin special pa e carchinan aki na A.T.A. mes.
Como parti di e 2019 Radex upgrade cu a tuma luga – un proyecto lidera pa IASA, cu A.T.A. ta aplaudi –, A.T.A. a warda y proteha e carchinan di imigracion fisico den e warehouse di A.T.A. A dicidi di wanta nan pa asina ora cu e sistema di imigracion, cual ta Radex, ta back on track, A.T.A. por valida e hecho cu e cifranan ta corecto pa medio di control a base di e carchinan fisico. Pues carchinan a keda warda pa un tempo mas largo cu normal. Entretanto, A.T.A. a percura pa gran mayoria di e carchinan y a destrui nan y a hiba nan dump. Desafortunadamente den e estadio final di “opruiming” di e warehouse, a keda poco carchi di imigracion hunto cu otro material promocional bieu cu a wordo tira den e waste bucket di e warehouse.
Den e tantisimo aña cu A.T.A. ta trahando cu autoridadnan concerni y e sistema di RADEX, nunca a perhudica e confiansa di e socio concerni y di e turista. A.T.A. ta asumi respondabilidad pa cu e hecho aki y ta asumi alavez e responsabilidad pa remedia esaki inmediatamente. Cual a wordo haci! Por sigui confia riba e proceso cu A.T.A. y otronan concerni ta adheri na dje.
Ta pidi disculpa pa e inconveniencia cu por a causa. A.T.A. ta maneha multiple (mas cu miyones) di data pa añanan largo y lo sigui haci esaki debidamente! Semper a conta riba e confiansa di e clientenan y socionan y lo sigura cu lo sigui haci esaki.
