E temporada di campamento ta den porta un biaha mas, pa cual nos reportero Leo Geerman tabatin un entrevista cu Liberato Hoek, Hefe di servicio di Ambulance. Esaki den cuadro di e tareanan cu e temporada aki ta trece pa su departamento.
Hoek a splica cu Siman Santo ta den porta un biaha mas, y manera tur aña servicio di Ambulance t’ey pa duna servicio medico na momento cu ta necesario, ta consciente cu lo ta un weekend largo cu e departamento lo ta brindando nan servicio medico for di diahuebs na comunidad.
E hefe di servicio di ambulance a accentua cu nan ta bon prepara cu e servicionan na e “post- nan” di custumber. A remarca cu hopi hende ta puntra si tin ambulance banda di e area di beach. Hoek a aclaria cu no tin ambulance na e area di beach pero e servicio ta ubica na e “postnan” y den caso cu tin un incidente meldkamer lo avisa ambulance pa esaki.
Pa por facilita informacion na comunidad di e localidad di e tres “postnan” di servicio di ambulance, ta reparti como lo siguiente: 1) Centrale situa na Wayaca, 2) IMSAN situa na San Nicolas y 3) Schotlandstraat cu ta situa cerca di area di beach.
Hoek a agrega cu ultimo dianan por nota cu e clima ta hopi calor: Tin menos biento, e nivel di rayonan UV (Ultra Violeto) cu solo ta emiti ta mas halto cu normal, riba cual a haci un apelacion pa uza sunblock, bebe suficiente awa, hidrata hopi preferiblemente cu awa en bes di alcohol.
Na personanan cu ta sufri di malesa cronico pa tuma nan remedi na tempo y no bay combina esaki cu alcohol, pasobra e por causa hopi malestar. A haci un apelacion pa pone atencion specialmente riba e muchanan pa nan tin nan sunblock poni y bebe hopi likido. Hoek a enfatisa fuertemente pa si muchanan ta na beach of pool pa percura cu nan tin un “zwemvest” of “zwembandje” bisti pa evita cualkier situacion lamentabel y tene bon bista riba nan.
Otro aspecto importante pa tene na cuenta ta na momento di yama e number di emergencia 911 – e centralista lo haci cierto preguntanan. E hefe di ambulance a remarca cu no ta e intencion di e centralista bay haci fastioso na telefon haciendo preguntanan, ta simplemente pa duna prioridad na e yamada cu drenta. Si ta den caso di campamento ta importante pa bisa e centralista na unda ta ubica. Hoek a duna un ehempel manera Baby Beach cu a area ta uno hopi grandi cu no tin borchinan pa orienta e chauffeur di ambulance e localidad for di unda e persona ta yamando.
Pesei ta importante pa informa e centralista na unda ta situa y pa para pafo pa orienta e na yegada di e chauffeur di ambulance cu asina por yega den un menos tempo na e sitio, “door cu e tempo ta conta”.
