Diaranson atardi, den careda di 6:40 pm, a sosode un accidente n’e t-weg di Bloemond, Paradera. E accidente aki a sosode debi cu chauffeur di e pickup no a kita e señal di bira. E accidente tabata entre un Nissan March oranje y un pickup Hillux preto.
Chauffeur di e Nissan March a mira cu e pickup tabata biniendo direccion ariba, pero tabatin su señal pa lora na man drechi. El a bay sali for di e caminda di paseit y aki ta unda el a realisa laat cu e pickup no ta bay lora, consecuentemente nan a accidenta.
Tanto polis di trafico como representante di 165 a presenta na e sitio pa asina documenta e accidente aki. A pidi asistencia di ambulance pa atende cu un persona tabata keha di dolor pero tambe pa controla un baby cu ta den e auto. Na yegada di ambulance, e paramediconan a controla e persona cu tabata tin dolor, tambe a controla e baby, kende no a sufri ningun herida. E Nissan March a sufri daño material na banda robes y dilanti, mientras e pickup no a ricibi hopi daño material.
