Gobierno di Colombia ta informa cu mas di 85.000 migrante Venezolano a crusa frontera di Ecuador via Colombia den e ultimo luna, esaki ta prome cu e restriccionnan nobo di visa di Quito cu a drenta na vigor dialuna.
E cantidad di migrante cu ta drenta Ecuador via e frontera di Rumichaca a alcansa e cifra di 11.000 durante fin di siman, cu ta un aumento di 30% den comparacion cu e trafico normal, segun e cifranan di e agencia di migracion di Colombia.
Colombia ta hogar di mas o menos 1,4 miyon di Venezolano cu a huy di un crisis profundo politico y di economia cu a provoca escasez di cuminda y medicina. Shen mil otro personanan mas a pasa door di e pais durante cu nan ta na caminda pa Ecuador, Peru, Chile y otro destinacionnan.
Awor Ecuador ta exigi un visa pa ciudadanonan Venezolano, esaki ta parti di un politica di inmigracion mas estricto cu actualmente ta implementando den varios pais.
Den un comunicado, e Minister di relacionnan exterior di Colombia esta Carlos Holems Trujilio, a bisa cu e regla nobo no lo evita hende di inmigra pa motibo di necesidad, sino lo aumenta e cantidad di persona cu ta uza crusamento informal.
E paso di migrantenan a traves di areanan no autorisa, yama ‘shortcuts’, ta aumenta crimen y traficacion humano, poniendo bida di hende na peliger, Trujillo a bisa. Tambe e ta impedi e estado di identifica e populacion cu ta drenta, nificando cu e cifranan di inmigracion no ta conoci cu siguransa y politicanan necesario no por wordo implementa pa atende e poblacion eynan.
Diferente na su bisiñanan, Colombia no a establece rekisitonan stricto di inmigracion, sino ta curasha e migrantenan cu ta drenta e pais di un manera informal pa registra cu autoridadnan p’asina nan por tin acceso na medico, scol y otro servicionan social.
Colombia a informa cu e luna aki lo duna nacionalidad na mas cu 24.000 mucha naci den e pais di mayornan Venezolano, pa evita cu e muchanan ta sin un nacionalidad y tin menos acceso na servicionan publico.
Un 320.000 Venezolano ta bibando actualmente na Ecuador. E gobierno ta calcula cu e cifra por aumenta te casi mey miyon pa fin di aña.
