Pa algun aña caba Fundacion Pa Nos Comunidad (FPNC) ta brinda yudansa na famianan cu mester di dje. E fundacion a haya e di tres container for di Super Food desde cu COVID a yega na maart. E fundacion ta contento pasobra esaki ta donacion di clientenan cu a cumpra na e supermercado y e productonan ta destina p’e clientenan di FPNC.
Nan a haya productonan di higiena, habon di laba co’i kibra, habon di laba paña y otro mas. Tambe a haya cosnan di comestibel manera juice, papa, lechi y hopi mas.
Gianaika van der Biezen, director di Fundacion Pa Nos Comunidad, a splica cu a habri 2021 cu e meta di sigui cu e reto.
Cada bes mas famia ta acerca e fundacion pa yudansa, tin di nan a cuminsa traha bek y otro awo a yega den un situacion fastioso. Tambe tin otro clinete cu ta duna espacio pa duna yudansa na otro famia cu mester di dje.
Aruba completo ta enfrentando situacionnan dificil. Esey a pone cu e fundacion ainda tin hopi reto dificil, pero cu yudansa di comerciantenan ta haci esey posibel.
