Cuerpo Policial ta conta cu 48 agente policial mas cu a completa e curso specialisa di Aruba Certification Program.
E curso specialisa aki ta inclui un modulo di servicio cu ta carga e nomber ‘Autoridad cu Amabilidad’. E concepto di ‘Autoridad cu Amabilidad’ ta pa concientisa e agente policial cu emberdad ta asina cu ora e ta na pia di trabou e ta den e puesto di autoridad, sinembargo tambe mester tene na mente cu tin ocasion cu e lo mester brinda servicio cu ta refleha e amabilidad ‘Rubiano.
Pa Aruba Excellence Foundation, e partner di Aruba Tourism Authority encarga cu e maneho y di Aruba Certification Program, ta un honor pa por a facilita un di dos grupo di agente policial cu e curso specialisa aki. E curso menciona a wordo diseña conhuntamente cu Hotel Management School Maastricht. Aruba Excellence Foundation tin un acuerdo cu Cuerpo Policial Arubano pa asina por certifica henter e cuerpo. Esaki sigur ta pa duna e cuerpo informacion corecto y consistente relaciona cu nos historia, cultura y naturalesa pero tambe sigur cu un enfoke riba servicio excelente. Un palabra di pabien ta bai na cada un di e participantenan cu a wordo certifica.
Aruba Certification Program – Mi Compromiso a cuminsa na aña 2011 como un programa di certificacion pa e industria di hospitalidad, actualmente tin mas di 4600 persona certifica cu tin e conosemente corecto y amplio di nos historia, cultura, naturalesa y servicio excelente. Pa mas informacion di Aruba Certification Program por manda un email na [email protected]
