Esnan cu ta sigui desaroyo politico na Aruba por a mira cu keto bay Marisol Tromp no a wordo nombra como minister. Algo cu mester a sosode ya caba desde 12 di December ora cu Otmar Oduber a bandona gobernacion.
Awor gobierno ta gobernando cu un minister menos di POR. E problema aki no ta pa motibo di POR. Tur cos ta regla y Marisol Tromp su cosnan a ser entrega manera a wordo pidi di dje. Mientrastanto den MEP tin un problema serio. E gobierno aki desde cu Daphne Lejuez a bandona gobernacion a keda cu sosten di 11 miembro di coalicion.
Awe si ta bon e 11 sosten aki no ta 100%. Sospechoso Luigi Bergen cu a wordo forsa pa bandona parlamento te awe no a haci tal. E mes a anuncia y tambe Hendrik Tevreden a anuncia esaki aña pasa den un conferencia. Solamente a bisa cu e lo retira asina cu aña habri pasobra cu kier pasa presupuesto 2020 prome cu aña 2019 termina. Esaki tampoco a sosode y awor mester atende cu presupuesto 2020 den e proximo simannan. Mientrastanto sospechoso Luigi Bergen tey keto bay. E no a bay entrega su retiro pasobra cu e kier un funcion di director den un departamento di gobierno cu salario astronomico. Como sospechoso e kier negocia su retiro pa un top funcion. Algo cu ainda Evelyn Croes no por keda cla cune den su partido of gobernacion.
Mientras cu Evelyn Croes no keda cla cu sospechoso Luigi Bergen, e parlamentario nobo di MEP no por drenta. Mientras cu Evelyn Croes no keda cla cu sospechoso Luigi Bergen, no por gamble pa credencialnan di Marisol Tromp den Parlamento. No ta confia riba e 11 asiento ficticio di coalicion. Esey ta stroba e nombracion di Marisol Tromp como minister y entrada di e candidata nobo di POR den parlamento. E gobierno actual no tin sosten di 11 asiento mas den parlamento. Nan no ta yama reunion y presidente di parlamento ta den un silencio total pero disgusta. Mescos e silencio aki ta presente den MEP su fraccion tambe pasobra no sa con pa Sali splica. Luigi Bergen e disparce y no por conta cune mientras e no haya su kier. Marisol Tromp di POR awor aki mester keda sufri of keda perhudica pa problema interno den MEP.
