Asina cu a bira conoci cu Partido POR ta retira su sosten na Minister Marisol Lopez-Tromp y no ta desea pa e keda mas den partido, mesora e sostenedonan y votadonan di e Minister a pidi pa haya contesta. Diasabra anochi 7:00pm caba a invit’e pa un reunion di contacto na Saliña Cerca, den cual riba 50 votado a scucha di su propio boca, kico ta pasando den POR y kico lo bira e siguiente paso. Un cos ta sigur, Marisol Lopez-Tromp lo no tuma su retiro.
E Lider interino di partido POR y alabes Minister di Husticia, mr. Andin Bikker, a anuncia cu a retira confiansa den Minister di Desaroyo Teritorial, Infrastructura y Medio Ambiente, esta drs. Marisol Lopez-Tromp. A duna varios motibo dicon a yega na e decision aki.
Riba invitacion di diferente famia y habitantenan di Noord cu kier a haya sa mas informacion p’e situacion di diabierna, Minister Lopez a topa cu nan. El a contesta e preguntanan haci na su persona, pero tambe a scucha e pensamentonan di e personanan, votadonan y sostenedonan. El a ricibi e carta cu POR ta pidiendo su retiro mas tarda dialuna mainta. Esunnan cu a pidi pa mira e contenido di carta por a mira esaki y na mes momento el a splica tur presente kico ta su pensamento. Tur cu a tuma contacto cu e mandatario ta di opinion cu e no mester retira. Segun Minister Lopez-Tromp, e lo reacciona riba e carta aki e siman cu ta bin.
E mandatario a reuni diahuebs ultimo cu e directiva di Serlimar y tur cu a compañ’e pa contesta preguntanan di Parlamentarionan. E reunion a dura casi 3 ora y el a sinti cu tur loke Parlamentarionan tabata kier sa y a puntra, a contesta nan transparente y na un forma cu nan por haya tur informacion. El a sali for di e reunion ey cu bon sentimento di cual e Parlamentarionan a mustra di compronde e situacion. E carta ricibi ta cuestiona e decision pa otorga Serlimar un status pa e por salbaguardia e compania y evita cu su creditornan ta pone beslag riba dje. Pesey Lopez a keda asombra ora cu a nota cu ta uza e mesun motibo ey pa kita confiansa di dje. Esaki siendo un dia prome e dos Parlamentarionan di POR tabata den Parlamento y a sostene e decisionnan cu el a tuma.
Den e carta tin cantidad di punto poni, di cual Minister Lopez-Tromp lo ta dunando contesta riba nan mirando e forma cu nan a haci esey oficial. Asina cu siman habri, manera Minister Bikker a indica p’e pone pen abou, no traha mas y entrega su retiro. Esaki no ta keda na Minister Bikker pa dicidi esey, pasobra como persona studia den ley e lo mester sa cu Parlamento ta e unico organo cu por determina si ta retira un Minister of e ta keda. E mandatario ta sinti cu awo e trabounan a inicia mirando cu e ta den e funcion ey pa apenas 4 luna. E ta siguiendo e acuerdo di gobernacion y tur punto cu tin, a pasa un screening y ta un persona integro pa haci e trabou. E ta kere cu pueblo por confia den dje pa haci e trabou mas cu e por na su alcance.
A ricibi diferente pregunta durante e encuentro y un di nan tabata riba Serlimar, unda a bin cu un herstel plan pa purba rescata un compania cu ta tecnicamente failliet. E ta haciendo su esfuerso pa percura cu e compania por sigui existi. P’esey a tuma pasonan pa salvaguardia esaki. E partido no ta di acuerdo pa duna e compania un espacio di hala rosea, pa asina aki e por mehora internamente. E mandatario a bisa cu esey ta un di e puntonan cu lo adresa asina e siman habri.
Loading…
Reload document 
Open in new tab Pero, tin un realidad riba mesa….POR no kier Tromp mas riba nan lista ni den Gobierno. Te cuanto por wanta e posicion di Minister si Bo mesun partido no ta sostene Bo? Partido ta e vehiculo cu ta pertenece na dje y ta bay eleccion cu ne. Pero na momento di bira Parlamentario, aunke tin partido, ta traha pa interes general, segun Minister Lopez a splica. Esaki ta conta pa Minister tambe, kende ta forma na un partido pero e interes como Minister no mester ta p’e partido sino pueblo en general. Tur esaki ta loke Minister Lopez-Tromp ta haciendo y ta convenci di ta haciendo esaki cu un consenshi limpi.
