Awe merdia a yega Aruba un avion di carga di US Air Force cu 45 militar Mericano abordo. Nan a yega cu hopi ekipo pa un periodo di un luna pa train sambuya. Nan lo keda durante e periodo di 4 siman na Marinierskazerne Savaneta, cu lo asisti nan den e training pisa aki.
Marc Brouwer, un Hulandes, pero trahando den funcion di capitan na US Marine Corps, a yega riba e vuelo aki. El a conta nos cu tur aña e 2nd Recon Battalion ta bin Aruba pa por train duik. Nan a bini for di Jacksonville, North Carolina y lo sigui un curso di sambuya for di un instructor di Marinierskazerne Savaneta. E militarnan Mericano lo permanece tambe na Marinierskazerne Savaneta te na mita di luna di december, ora nan regresa Merca atrobe.
Awe nan a yega abordo di e avion, considera como e cabay di trabou di US Air Force, esta e avion di carga modelo C-17. Eyden por biaha hopi hende, auto, ekipo y otro carga pisa, specialmente nan ekiponan di duik.
E avion a keda Aruba un rato so. A descarga tur e ekiponan cu e militarnan Mericano a yega cu ne, a “fuel” no menos cu 30 mil liter di combustibel den e avion y a lanta vuelo atrobe pa su siguiente destinacion.
E di 7 scuadron di avionnan militar Mericano ta pertenece na e “62d Airlift Wing” basa na e “McChord Air Force Base” na Washington, DC. Ey nan ta opera e avionnan marca Boeing modelo C-17 Globemaster III trahando pa US Air Force por cumpli cu nan misionnan na nivel mundial.
E avion di carga militar mester tres tripulante pa por opera, esta un piloto, un co-piloto y un “loadmaster” pa maneha e carga patras. E compartimento di carga ta midi 27 meter largo y 5.5 meter hancho y 3.76 meter di haltura. Den e compartimento por biaha cu vehiculonan y hasta carga riba pallet. E cantidad maximo di carga ta 77.500 kilo. Pa e avion por lanta e no por pisa mas cu 265 mil kilo. E ta bula na un haltura di 28 mil pia na un velocidad di 830 kilometer pa ora. E ta capas pa por carga 102 militar hunto cu nan ekiponan pa bula den pleno vuelo cu nan parachute.
E avion C-17 ta diseña pa opera riba pista di aterisahe cortico, di unicamente 1.100 meter di largura y solamente 27 meter di hanchura.