Dialuna otro siman, 12 te cu diaranson 14 di december e caso Avestruz lo continua su proceso dilanti mesa berde. Den e ocasion aki e abogadonan defensor di e sospechosonan lo tin e oportunidad pa presenta nan defensa dilanti hues. Manera nos tur sa, e caso Avestruz a cuminsa na september y awor a yega su culminacion na december.
Esaki ta e ultimo fase di e caso mas grandi di corupcion den historia di pais Aruba. Benny Sevinger tin cinco acusacion serio contra di dje: 1) Falsificacion, 2) Estafa, 3) Labamento di Placa, 4) Abuso di funcion, 5) Soborno. Un caso sigui di cerca pa comunidad y cu a crea hopi conmocion den pueblo. Fiscal den su requisitoir ta declara cu e grupo chikito den Benny su circulo di amigo a bira “stinkend rijk.” Nan a bira stinkend rijk riba custia di pueblo y riba custia di e patrimonio di pueblo. Ta mas cu claro cu hopi hende ta hostina pa e accionnan di e ex-minister Sevinger.
Mientras Benny ta scondi den accion y no por wak e ningun caminda, su lider Mike Eman ta muisstil riba e caso. Bao di e mascarada di un protesta ficticio, e coalicion di AVP lidera pa Mike Eman, a core sali for di sala di Parlamento y e no kier a trata e presupuesto 2023 di Aruba, pa asina evita enfrenta coleganan riba e realidad di Benny y e caso Avestruz. T’e dia di awe ningun colega di su fraccion a tribi di vocifera algo riba e caso aki. Pa e simannan awor no a mira ni tende algo di e protagonista di caso Avestruz. Ta bay ta interesante pa mira kico lo bay sucede na januari of februari 2023, y cual lo ta e sentencia di hues den e caso notorio aki.
E postura di Benny ta interesante, despues cu el a para cu basta arogancia den parlamento, gritando barbaridad manera; “E gobierno aki su dianan ta conta, esey ta bo dianan tambe sr. Presidente!” Ademas den otro ocasion Benny a sinta gaba y grita cu ningun hende lo kit’e for den parlamento, y con el a manda e coleganan den coalicion bay “chupe.” Sinembargo, riba e ultimo dia cu fiscal a presenta e requisitoir di sesenta pagina contra Benny y diripiente ta parce cu tur su scamanan a baha. Hasta el a yora dilanti hues.
Aunke Benny a yora, despues el a lanta cabes atrobe y tanto su persona como e miembronan di fraccion di AVP a keda benta PG, landsrecherche, KPA, Hues y tur profesionalnan bao bus. Nan meta ta pa asesina nan caracter den un forma sistematico. Uzando e palabranan contra nan manera racista, narcista, politicamente motiva, parcial y hopi palabra completamente inapropia. Un cos ta sigur, mucho mas nos no lo mester warda pa un decision di hues. E dianan ta cortico, falta poco menos di dos luna pa un sentencia cay. Sigur, tin un presion grandi den seno di AVP. Otro sla pa e “bon comun” ta na caminda? Si Benny ta wordo haya culpabel pa hues, e apoyo pa criminalidad ta e “bon comun” cu Mike Eman kier siña nos hobennan? Cana sali di parlamento bao e argumentonan falso ta parti di e “bon comun?” Sin duda Mike, tur hende a ripara caba cu bo “bon comun” a muri un “mal morto comun!”
