Diabierna 14 di october 2022, na clubhuis di SV Juventud Tanki Leendert (JTL), a tuma luga un anochi special pa duna homenahe na e hungadonan y directiva di e ekipo cu na 1998 a coy campeon di Division Prome. E ekipo aki a logra promove pa Division Honor di AVB pa prome biaha den su historia. Tabata un anochi hopi special y ameno pa tur esunnan presente cu tabata tin hopi tempo sin wak otro. JTL a keda varios aña hungando den Division Honor despues di e logro grandi aki.
A habri e anochi cu un video, potret di e team y e wega unda cu Juventud Tanki Leendert a bira campeon na 1998. Despues di esaki a cuminsa duna reconocimento na cada hungado cu tabata forma di e ekipo aki, den forma di un certificado den un bunita frame. Tambe e miembronan di directiva a haya nan reconocimento bon mereci.
Esaki tabata e hungadonan di e ekipo legendario di 1998; Antonio Giel, Frido Giel, Jason Lejuez, RoberticoLejuez, Francis Petrocchi, Patrick Petrocchi, Rogelio Petrocchi, Bryan Leest, Edgar S. Croes, David Brete, Egbert Brete, Marco Berlis, Emilio Berlis, Gregory Milano, Glenn De Cuba, Andy De Cuba, Johnny Henriquez, Giovanny Webb, Anwar Diaz, Elton Trimon, Randal Trimon, Jeffrey Trimon, Antonio F. Tromp, Johnny Giel, Albert Vrolijk, Ivan Kelly, Randolf Blanco y Mario Lopez.
Reconocimento tambe a bay pa miembro di directiva y fundado di S.V. Juventud Tanki Leendert Rosendo “Boes” Petrocchi. Tambe a duna reconocimento na otro miembro di e directiva Roland “Jachi” de Cuba. Y finalmente un reconocimento special tambe a bay pa e masahista di e ekipo Hubert Leest.
