E conocido presentado di television y actual Presidente di RCTV, esta Marcel Granier ta presente durante e Asamblea General di Sociedad Interamericana de Prensa tumando luga na Utah entre 27 pa 30 di october. El a topa cu e representantenan di Aruba y mesora a bin saluda y a corda cuanto biaha e tabata bula pa Aruba pa vakantie. E kiermen awendia e no sa bin hopi mas pero ta saluda henter e comunidad cu pa hopi aña a sigui’e via television.
Marcel Granier, naci dia 4 di juli 1941 a studia ley y a casa cu e nieta di e fundado di 1BC y Radio Caracas Radio. Nan tin 6 yiu. Na aña 1969 el a stop di practica ley y a bira director di Radio Caracas Television (RCTV) y asina a sigui crece te bira Presidente di e compania. Desde November 1976 el a cuminsa cu e programa Primer Plano pa 30 aña, te na aña 2006.
RCTV a sostene of a duna hopi cobertura na e “coup” contra Presidente Chaves na aña 2002 cu consecuencia cu el a nenga di renoba e permiso di transmicion di e canal di television cu na 2007 a disparce for di aire y despues tambe for di Cable. Awendia nan ta transmiti via radio y ta produci programanan di television, pero pa pasa na otro canal.
El a bisa nos cu RCTV lo bin bek, asina cu Venezuela recobra su libertad bek, specialmente libertad di expresion. E tema aki riba su mes tabata parti di e discusionnan na Utah, pero tambe di e forma contra media di e actual Presidente di Merca, Donald Trump.
Riba e foto por aprecia Marcel Granier den compania di Mark Benson Denz y Patrick Paskel di Headlines Group, cas editor di e website mas lesa na Aruba, 24ora.com.
