No ta tur cos cu ta na moda nos mester imita y mas ainda transmiti , pa nos yiunan, palabra malo ta y ta keda un devaluacion, di personalidad di hende, e ta keda manera un hende cu tin un panja caro bisti, pero e no sa di balora locual cu e tin.
Palabra malo ta manera djente putri cual ta saca un holor ferfelo , ora nos ta den un combersacion. Hopi hende tin e pensamento cu un mucha cu ta papia palabra malo entre 1 pa 3 aña di edad , cu esey ta haci e mucha un mucha leuk.
Tin hende ta pensa cu or nan papia un palabra malo den otro idioma , esey ta haci nan mes un hende importante, pero palabra malo tin un raiz di maldicion.
Palabra malo no ta cos un cu mester wordo usa den b ocas y dalinati di bo famia, palabra malo ta haci daño verbal y ta corumpi e paz y trankilidad di bo cas. E no ta parti di educacion, bo no por usa un palabra malo pa encurasha ningun hende, pasobra palabra malo no tey pa encurasha, sino pa rebaha, y pone hende sinti nan mes malo, y pa ofende un persona mas profundo posibel.
Awe dia tin hopi cantica cu palabra malo, cual ta wordo gusta y propaganda, y hasta e videoclip ta contene palabra malo y escena vulgar pa asina por anima e cantica . Pero ningun di e cos nan aki ta duna un balor real na educacion.
Ta conoci pa nos tur cuanto palabra malo, bo ta mira scirbi riba muraya, y hasta den un style artistico, pero nan contribuicion na educacion ta nulo.
Como mayor bo mester Evita di tur forma cu palabra malo ta haci entrada den bo cas, pasobra esey ta haci e Spirito Santo di Dios tristo y e ta cuminsa serca bo mes cu ta mayor pa no papia palabra malo den bo cas ni cu bo yiunan , esposa, esposo , y cu ningun hende.
Beibel ta mustra nos cla den Efesios Capitulo 4:29 lo siguiente: No laga ningun palabra dañino sali for di bo boca, sino solamente palabra cu ta bon pa edificacion, conforme e necesidad di e momento, pa esaki por duna gracia na esnan cu ta tende.
Pasobra nos tin cu comprende cu ta for di palabra malo, tur amargura, furia,rabia, griteria,y calumnia ta cuminsa. Tur pleito y violencia ta cuminsa cu gritamento y palabra malo.
Tin hende no por papia , sin menciona un palabra malo,pasobra nan ta kere cu esey ta duna nan forsa of ta identifica nan como un hende fuerte.
Pero den un comunidad, caminda norma y balor familiar, respet y amor ta reina, un hende cu ta papia palabra malo constant ta debil y mester di ayudo.
Mescos cu un persona cu no por rasona y pidi despensa door di reconoce su fout y ta recuri na violencia, asina ta un persona cu boca yen di palabra malo, ta su forma di identificacion.
Bo ta tabata sa cu Goliat di Gat cu David a mata, tur mainta tabata insulta e pueblo di Israel cu palabra malo, y cual tabata su fin? Bo tabata sa cu Nabal e prome casa di Abigail tabata un homber cu su boca tabata yen di palabra malo, y kico a pasa cune?
Nos mester instrui nos yiunan den un bida drechi, pasobra palabra malo no ta nos cultura, nos grandinan ta hende decente, hende cu por a dialoga, y conseha riba tur tereno, sin papia un palabra malo.
Palabra malo y mentira ta dos arma di diabel pa spanta hende cune, y asina pa bo no aserca e persona cu ta papia palabra malo, pasobra bo ta haña miedo di dje.
Cuanto bon oportunidad no a bay perdi, pasobra e persona ta papia palabra malo y no ta respeta, cuanto Amistad no a wordo kibra pa motibo di palabra malo. Cuanto Famia no ta dividi, pa motibo di insulto y palabra malo.
Hasta crimen a wordo comete despues di uso di palabra malo, tin hende despues di yena nan boca cu palabra malo, no por a responde pa nan actonan y awe ta sinta castigo basta largo.
DIOS TA OFRECE LIMPIESA DI BOCA Y CURAZON GRATIS. Pasobra pabo ta liber di palabra malo,e no ta sosode cu colgate of listerine, pero cu un arepentimiento, buscando ayudo, di Dios pa haña liberacion di e mal custumber.
Palabra malo ta un mal spirito cu kier drenta bo bida, y mas bo pratica palabra malo, mas espacio bo ta dune mal spirito pa domina bo bida. STOP AWE, aserca e trono di gracia di Dios, y ricibi su pordon , y abo y bo Famia lo tin e paz completo cu solamente bo ta hañe den Cristo Hesus.
