E Director nobo di Aruba Ports Authority, Marc Figaroa, a haci un bishita di trabao na Port of Amsterdam na Hulanda y a topa cu e director Gert-Jan Nieuwenhuizen. Ey a ofrece e director di waf di Aruba un trip riba boto door di e waf di Amsterdam pa cera conoci cu e actividadnan di e waf na Hulanda.
Desde maart 2015 APA Aruba NV y Ports of Amsterdam a firma un contracto di cooperacion. E tempo ey bou Gabinete Mike Eman II. E cooperacion ta encera actividadnan riba diferente nivel entre e dos wafnan. E waf di Amsterdam ta e di 4 waf mas grandi di Europa pa loke ta stock y procesamento di producto di energia, manera combustibel y otro productonan petrolero. Den e region di e waf di Amsterdam ta traha en total 68 mil hende.
Durante e trip cu e boto, e delegacion Arubiano a haci entrega e economic policy brochure y e foyeto di Freezone na Gert-Jan Nieuwenhuizen pa nan ta na altura di e vision economico di Gabinete Wever-Croes. Nieuwenhuizen a aprecia esaki y a gradici Arubahuis cu a intermedia pa e contactonan entre Ports of Amsterdam y APA Aruba.
