Un caso basta serio a tuma luga na Alto Vista den ora di mainta na momento cu un ex-pareha a dicidi di secuestra e mama di su yiu cu menos bon intencion. A cuminsa un buskeda den Noord pa un Toyota Corola blanco.
Aproximadamente 7:30 am a bati alarma pa un caso di maltrato y menasa cu a cuminsa na un cas na Alto Vista. Un conocido disc jockey di evento nocturno a haye den problema serio cu husticia na momento cu el a obliga su ex-pareha di subi den su vehiculo cu ne sin su consentimento.
Problema ta andando di algun tempo caba, diadomingo atardi a pidi presencia di polis na e mes un adres aki na Alto Vista pa un desacuerdo, relaciona cu placa pa alimentacion di e yiu cu nan tin hunto. E ex-pareha a bay biba na dichi adres na Alto Vista despues di a kibra relacion cu e DJ.
Ta di asumi cu e relacion no a caba na bon mirando cu e agresor a presenta un biaha mas dialuna mainta na Alto Vista y e biaha aki cu menos bon intencion. E ex-pareha ta hospedando den e apartament parti patras di e cas na Alto Vista cu ta di un bon amiga di dje.
E amiga ta e persona cu a bati alarma na autoridad mirando cu e situacion a bay completamente for di man. Ulises Nuñes (DJ Niño) a menasa tur presente cu si e pareha no subi auto cu ne, e lo mata e pareha y tir’e na boca mahos. Cu e menasa ey, e ex- pareha a subi vehiculo cu e agresor y bandona sitio den e Toyota Corola menciona. A cuminsa un buskeda den area di Noord como tambe Bushiri y Madiki Kavel caminda e ta biba.
Mientrastanto e yiu a permanece cu e amiga na e cas na Alto Vista, sano y salbo. E amiga a haya informacion cu nan lo ta regresando e cas na Alto Vista y a informa autoridad di esaki. Den un forma planifica, a duna instruccion na tur patruya pa keda na un distancia y no visibel pa asina warda e sospechoso presenta na e cas y drenta den accion.
A rondona e vehiculo. Despues di tuma declaracion di ambos partido a detene e DJ na sitio. Por a tuma nota di marca di sanger visiblemente riba flanel di e sospechoso. Tambe por a nota cu e victima ta maltrata y tin golpi na boca. Mester menciona cu e declaracionnan ta contradictorio. E sospechoso ta insisti cu e no a agredi su ex-pareha pero mas bien ta e amiga ta esun cu a agredi su persona y cu ta pesey e tin sanger riba su paña.
Na sitio e testigo a duna di conoce mesora cu esaki no ta e caso. A transporta e sospechoso pa warda pa asina e duna cuenta cu su actonan cu ta basta serio den su contra.
