Prome Minister y alabes lider di MEP, mr. Evelyn Wever-Croes a anuncia awe mainta cu e siguiente candidato pa asumi e funcion di Parlamentario awor cu Sue-Ann Ras ta bandona Parlamento ta Luigi Bergen. Esey lo sosode aki tres siman. No ta tur hende ta na fabor di e nombracion di Bergen, specialmente pa problemanan matrimonial serio cu a conduci cu Minister Chris Romero, kende e ta acesora, a opta pa manda e y su amiga cas pa “calma cos”.
E cambio den Parlamento ta habri e discusion atrobe riba e cambio di ley cu e propio Dangui Oduber y Fraccion di MEP a propone. E cambio ta encera cu esun cu haya mas voto ta drenta Parlamento y no segun secuencia di lista. Den e caso ey, e ora Bergen tin un problema pasobra Darlaine Guedez a haya mas voto cune, 525 voto personal. Ainda tin mas candidato mas popular cune, manera Karel Jeandor cu 261 voto, Karel Maduro cu 385 voto y Arthur Vallego cu 972 voto personal.
Siendo un docente na Colegio EPI, Luigi Bergen a haya 187 voto riba su nomber den eleccion di aña 013. Sinembargo, na september 2017 e tabata candidato number 16 riba lista di MEP y a haya cu 237 voto riba su nomber. Si e logra drenta Parlamento, e lo ta e di dos Parlamentario cu menos voto di MEP, debi cu e record awo ta di Daphne Lejuez cu solamente 196 voto. E Parlamentario cu menos voto den henter Parlamento di Aruba ta Michael Lampe (AVP) cu unicamente 118 voto.
Luigi Bergen no ta pasando den e miho temponan di su bida personal actualmente. E proceso di separacion for di su señora ta bayendo cu bastante turbulencia. Di tal indole cu e señora a publica combersacionnan via whatsapp riba Facebook, mustrando publico cu Bergen tabata infiel y a bandona cas, lagando su yiunan desamapara atras. Su entrada awor aki den Parlamento lo bira un reto pa partido pasobra e problemanan personal lo bin cune tambe.
Bergen a campaña hopi pa elimina schoolgeld y kita aircogeld for di mayornan pa yiunan por bay scol sin gasto. Pero MEP no a haya e cartera di enseñansa y como tal el a bay traha como Consehero di Minister Chris Romero awor den Ministerio di Transporte Publico y Comunicacion. Bergen a haya varios funcion den fundacionnan y companianan estatal pa representa interesnan di Gobierno, cobrando un salario adicional na cada un di e companianan aki. Tur e entradanan aki lo mester stop awor cu e drenta Parlamento.
