Collegezaal di EPI tabata chikito pa e aglomeracion di hende cu a yega pa yama bon bini na e candidato nobo di partido AVP, mr. drs. Richard Arends. E sala tabata yen, e ambiente tremendo, e acogida grandi y e candidato nobo sublime den tur sentido di palabra. E prome orador tabata Luciano Milliard lector na Universidad di Aruba y gran conocedor di ley constitucional.
Milliard, a cuminsa na desea Richard hopi exito. “Richard, nos conoce otro desde cu bo a yega di manda mi un stuk cu bo a skirbi pa mi revisa, tempo bo tabata studiando ainda. Mi a tira un bista riba e stuk y a bisa ‘esaki ta un compas cu ta lanta confiansa.’ “Milliard a conta cu despues ora Richard a bin Aruba, nan a sinta y papia riba e stuk ya menciona. Despues di e encuentro aki Milliard a cataloga e stuk como un compas di analisis y inteligencia.
“Ora Richard a regresa Aruba na 2006 partido a pensa pa haci un cambio den liderazgo di FESCA (Fundacion di Estudionan Social Cristian Aruba) y a nace e idea pa lanta “Fundacion Digna Lacle-Herrera’ pa formacion politico. Mi a wordo aserca pa lider di partido pa mi tuma liderazgo di e fundacion nobo. Nos a busca un persona pa guia FESCA pa hibe na un siguiente nivel. Ken mas cu por a haci e trabou aki cu no ta Richrad Arends? Un hoben profesional, no solamente inteligente, pero cu a mustra cu e ta un compas cu ta wordo guia door di principionan.”
Interumpi cada rato pa aplauso Milliard a conta e multitud cu Richard a pidi’e pa keda cerca di dje. “Mi a bise NO, bo mes por haci’e. Bo no mester di mi. Asina el a busca su team nobo y a haci di FESCA loke e ta awe. Wonderful. Hunto nos a organisa diferente actividad y durante tur esaki Richard a demostra di ta un compas di dedicacion y liderazgo.” El a sigui bisando cu e compas aki di inteligencia, di liderazgo, cu ta wordo guia pa medio di principio ta loke Aruba tin mester di dje.
Dirigiendo su mes na Richard Millaird a bise: “Bo ta bay ta exitoso y semper corda cu bo ta bay ta un compas cu ta bay yuda guia e pais aki. Bo a drenta arena politico pa haci un contribucion na comunidad. Semper corda esey.” Milliard a bis’e algun palabra den Creole, ya cu Richard banda di sa varios otro idioma, ta domina e lenguage ey siendo descendiente Haitiano pa banda di su mama.
Finalisando Milliard a bisa “Pueblo di Aruba, mi ta presenta boso Richard Arends.” Un aplauso largo y intenso a sigui.
