Lotto ta produci e di dos miyonario pa e aña aki…den Playa

Un rato pasa Lotto di Aruba a saca e numbernan ganado den su sorteo # 1178 di Mini Mega. E numbernan ganado a resulta 16-23-27-29 y Mega Ball 06. Un solo persona a combina e numbernan ganado aki, bon pa un bunita premio di Afl. 1.300.000,=. Den e caso aki e ganado a hunga Mini Mega Plus y a bay cu e premio completo. El a cumpr’e na Lucky Numbers situa den Hendrikstraat na Oranjestad.

Ta bon pa informa cu esaki ta e di dos premio miyonario pa aña 2019. E prome tabata dia 5 di april, ora cu un hungado a gana e bunita premio di Afl. 1.250.000,= na Suerte di Pos Chiquito Lottery. Den apenas tres luna, danki na e aporte y sosten di e hungadonan, ata Lotto di Aruba ta aporta cu un otro premio grandi cu ta haci un otro famia miyonario atrobe. Ta di e forma aki Lotto ta “cambiando bida” di su hungadonan.

 

Lotto haciendo hopi famia miyonario

Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior. Cifranan di aña 2018 ta papia di un benta di mas o menos 48 miyon florin. Aña pasa varios di e premionan miyonario a cay den e districto di Noord.

Lotto ta aporta na economia y na trabou

Tin mas di 180 rebendedo di Lotto di Aruba, situa tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi. Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Departamento di Impuesto. Tur esaki ta afecta nos economia den forma positivo.

Tocante Lotto di Aruba

Lotto, e loteria di Aruba tin diferente wega manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa y Gana.

Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di un donacion di 4.5 miyon florin tur aña na e comision di subsidio.