Un evento cu ta mustra un otro cara di Aruba y cu tin beneficionan sigur di balor agrega, ta e prestigioso Aruba Symphony Festival & Academy. Ya den su di 5 edicion, e festival ta tumando luga for di dia 17 di juli te cu dia 27 di juli. Por a nota riba e prome anochi cu e interes di nos comunidad ta hopi grandi. A ricibi e variedad amplio di musica cu un tremendo entusiasmoAruba Symphony Festival & Academy tawata un soño realisa door di e presidente y director artistico di e festival Simon Gollo.

Originalmente di Maracaibo – Venezuela, Gollo a studia musica na Alemania y Suecia. Despues di su estudio el a bolbe su pais natal y a funda Nuevo Mundo Festival & Academy unda el a dirigi pa 12 aña. Debi na e situacion na Venezuela, Gollo a haya su mes forsa pa reloca su evento, na unda el a busca un pais cu lo aprecia e musica pero alabes cu lo ta cerca di su curason cual ta nos isla Aruba.

Diaranson ultimo, durante e apertura oficial di e festival, Gollo a ricibi e reconocimento di embahador special for di man di Ronella Tjin Asjoe-Croes – CEO di Aruba Tourism Authority, pa su tantisimo bishitanan na Aruba, pero principalmente pa su contribucion inmenso na nos comunidad.

Tjin Asjoe-Croes a añadi: “Semper ta un placer pa reconoce esunnan cu ta bishita nos isla regularmente y ta mas placer ainda ora bo ta ripara cu e personanan aki ta mustra nan aprecio pa nos isla den diferente manera y ta bay un tiki mas leu pa ora ta trata nan dedicacion y kico nan ta haci pa Aruba.”

Simon Gollo tin casi 15 aña ta bishita nos isla y a contribui grandemente na nos enseñansa musical, ofreciendo conciertonan yyudando cu donacionnan na e Aruba Scholarship Foundation. Ademas di esaki, el a duna les gratuitamente mientras cu e tabata biaha rond mundo pa duna concierto.

A.T.A. ta duna su sosten na eventonan manera esaki, mirando cu e ta algo no solamente bon pa nos comunidad, cultura y desaroyo pero tambe ta un evento atractivo pa nos bishitantenan y ta permiti pa nan mira un otro cara di nos destinacion.”

Cu e festivalnan aki, Gollo su meta ta entre otro pa Aruba por sirbi como un centro musical internacional y alabes un portal cultural.

E participantenan musico atrae ta entre otro di Inglatera, Venezuela, Brasil, Colombia Suecia, China, Argentina y Merca.

Aruba Symphony Festival & Academy su programa ta inclui 10 concierto cu musica hopi varia, na diferente sitio rond Aruba cual tur ta entrada gratis y solamente e ultimo anochi ta paga pa entrada.

Comments

comments