Diasabra a rindi homenahe na Lori Simmons, cu a baha cu pensioen bon mereci despues di a labora pa 43 aña na Departamento di Inmigracion di Aruba.
Simmons a cuminsa na bisa cu tabata 43 aña cu hopi reto, pa por traha na Inmigracion bo mester ta un persona hopi integro y bin traha tur dia c’un sonrisa riba bo cara. Pa traha na Inmigracion, bo mester ta un persona cu por deal cu hende, vooral si tin hende cu a bin di afo y a encontra cierto cosnan cu no ta na nan agrado y nan ta bin cu mal beis.
Pero como Inmigracion, e trahado mester ricibinan c’un smile y laganan sa cu tur cos ta ok. Den su 43 aña trahando na Inmigracion, el a maak mee hopi cos, tanto positivo como negativo. Pero e cosnan positivo ta hopi mas cu e cosnan negativo.
MENSAHE
Un mensahe Lori tabata tin pa e hobennan di awendia cu ta drenta y ocupa diferente funcion na Inmigracion di Aruba, ta pa ora nan bin traha, bin traha cu un mente positivo, bin traha cu smaak y haci bo trabou na miho di bo conocemento. Semper duna lo miho di bo mes, pasobra esey ta importante pa hiba e pais dilanti.
Presente e anochi aki tambe tabata t’ey ex-colega, Harold Fingal, c’un tempo pasa tambe a baha cu pension, cu tabata tin palabra bunita pa Lori.
Lori no ta un hende cu bo mester pidie pa duna un man, esey ta sali for di su curason. E ta un hende semper c’un sonrisa servicial, cla pa yuda su coleganan pa asina como un solo ekipo, traha na bienestar di nos pais.
