Den siman tra’i lomba, Wardacosta a bolbe gara otro boto cu droga. Esaki ta pone cu, den apenas 15 dia, a para cinco boto cu droga y uno cu ilegal yegando Aruba. Seis boto ta nifica cu Wardacosta ta basta activo. Hunto cu Polis ta vigila e radar y asina ta activa cada uno cu mester actua. E avion di Wardacosta tambe tin un rol importante den varios di e accionnan exitoso.
E di cinco boto cu Wardacosta a sigui no tabata facil pa stop. A basha bala riba e boto prome cu por a logra par’e. A detene tur hende y tabata tin riba 400 kilo di droga abordo destina pa Aruba. Wardacosta y e departamento di droga di Polis tin e caso aki hermeticamente cera. Nan ta trahando riba diferente caso simultaneamente pa asina pone man riba esunnan cu na tera tambe ta envolvi of pa kendenan e droga tabata destina.
E di seis boto ta esun cu ilegal abordo. Ta trata di ocho persona indocumenta cu a purba di yega tera. Aki tambe tabata un combinacion di Wardacosta y Polis. Pa awo ultimo dos siman tin un total di tres boto local gara cu droga, dos persecucion tras di boto no local cu hopi droga y uno cu e ocho ilegalnan abordo. Pabien na Wardacosta y Polis cu nan tremendo trabou.
