Awe mainta trempan pa mas of menos 7:00 am a sosode dos accidente casi simulnateo, na e mesun sitio. Ta trata aki di e caminda grandi di Hato, net patras di e kazerne di Brandweer na Tanki Flip. E saldo di e accidente ta cuater auto destrui, pero cu dos accidente separa, pero tur cos na e mesun caminda y e mesun ora. Por lo menos un di e victimanan ta den coma na hospital, pasobra parce el a fractura su nek.
Na sitio por a compronde cu e accidente principal tabata entre dos vehiculo, cu a dal casi frontal den otro riba e caminda grandi cu ta core di rotonde di Tanki Flip pa e rotonde di Pos Abou. Pero, un auto marca Nissan modelo Murano cu tabata biniendo net tras di un di e autonan envolvi den e accidente a cera brake diripiente, mientras cu e auto biniendo su tras, cu no a tene cuenta cu el a brake, a claba su tras cu consecuencia cu e tambe a bay dilanti y bolbe bay dal den e accidente cu apenas a sosode. Por lo menos un di e autonan envolvi den e prome accidente a bay cay den e rooi band’i caminda. E chauffeur a keda pega den e vehiculo.
Yiu di un di e victimanan a laga sa cu un di e autonan tabata core duro y pasando tur otro riba e caminda relativamente smal di Hato. Parce cu ora e mester a drenta bek den su liña, el a perde control dal den trafico contrario cu consecuencia cu e otro auto a bay bolter cay den e rooi. Tabata un wela na stuur hibando su nieto scol, cu inocentemente a bin haya su mes den un accidente. Danki Dios cu e muchanan no a resulta herida. Pero nan a pasa den un susto grandi si.
Tres unidad di ambulance a presenta na sitio pa atende cu heridonan. Mientras cu bomberonan tambe a presenta pa saca e victima pega den auto.
Polis a cera rotonde di Tanki Flip pa evita e trafico di tuma e ruta aki pa asina e ekipo di rescate na sitio por a traha riba e situacion. A transporta e heridonan pa Hopsital y despues di algun ora a habri caminda bek pa trafico. Riba imagen tin un bista di con e vehiculonan a keda cual sigur ta duna un susto na cualkier curason.
