Den fin di siman for di 22 pa 27 di februari 2021 a tuma luga e campeonato Copa Panamericao y e Colombia Open Sub-15 y Sub-17. Tabata tin un participacion di 248 atleta masculino y femenino di 16 pais di Continente Panamericano. E competencia tabata dirigi for di Colombia virtual via ZOOM. Aruba a participa cu e delegacion cu ta consisiti di 1 atleta femenino y 5 atleta masculino.
E competencia a tuma luga den Compleho Deportivo Frans Figaroa na Noord. E prome atleta cu a bin den accion tabata Caytlynne Lanoy den categoria di 49kg di Sub-15, cual tabata tin 10 atleta. El a logra den su hisadanan den snatch 43kg, clean & jerk 56kg pa un total di 99kg ta termina na di 7 luga. Esaki ta prome competencia internacional di e atleta aki y a haci un bon presentacion,
Den categoria di 55kg masculino Sub-15 tabata tin 8 atleta y aki Aruba tabata tin dos hisado. E prome tabata Derrick Webb cu a logra den snacth 48kg y clean & jerk 61kg pa un total di 109kg y a termina na di 7 luga. Tame el a kibra su record personal. Trevor Faro tabata e di dos atleta y a hisa den snatch 51kg, clean & jerk 60kg pa un total di 111kg. El a termina na di 6 luga. Trevor tambe ta kibra su record personal.
Den categoria di 89kg SUB 17 tabata tin Jeremy Dijkhoff y el a competi contra 6 atleta den su categoria. Jeremy mester a bataya duro pa logra den su hisadanan, unda den snatch el a logra 101kg, clean & jerk 129kg pa un total di 221kg. Cu e total aki Jeremy ta logra gana 6 medaya di brons pa Aruba. Prome luga medaya di oro a bay pa Mexico cu 256kg total y medaya di plata a bay pa Colombia cu 239 total.
Otro atleta cu ta hisa pa prome biaha ta Ender Ortiz. El a hisa den su categoria di 96kg Sub-15. Aki tabata tin 3 atleta y el a logra den su hisadanan den snatch 60kg, clean & jerk 75kg pa un total di 135kg. Cu e total aki Ender ta gana 6 medaya di Brons pa Aruba. Medaya di oro a bay pa Ecuador cu 195kg total y medaya di plata a bay pa Chile cu148kg total.
Por ultimo tabata Ethan Ruiz y el a hisa den categoria di 102kg. E tabata tin tres atleta de su categoria y mester a bataya duro contra e atleta di Chile p’asina logra gana 6 medaya di plata den su categoria. Ethan ta logra den su hisadanan den snatch 57kg, clean & jerk 71kg pa un total di 128kg. Ethan cu e total aki ta kibra su record personal. Medaya di oro a bay pa Ecuador cu 155kg total y medaya di brons a bay pa Chile cu 127kg total.
Aruba Amateur Weigtliting Association kier a manda palabra di pabien na tur atleta cu a participa, di a kibra nan record personal y esunnan cu a gana medaya pa Aruba. Tambe ta manda palabra di gradicimento pa Entrenador Internacional Walter LLerena for di Ecuador y tur boluntario cu a yuda den e Campeonato Copa Panamericano y Colombia Open.
