A sali un anuncio di parti di Cuerpo Policial, riba un maneho pa structura e area na entrada y salida di waf crucero, caminda cu miles di turista ta pasa y cu hopi hende ta gana nan pan di cada dia. Eynan, cada hende ta bin busca nan pan, pa nan tour, etc. Nan ta bin cu nan truck, nan bus y/of huur un ke otro vehiculo pa e turista gosa di nos isla. Pesey mes mester a bin cu un poco cambio. Algun tempo pasa kier a haci’e caba, pero e no a logra. Despues di kisas papiamento, a logra pone y structura e vecindario aki.

Lito Kock ta e polis encarga cu e vecindario en cuestion, ta pa garantisa e siguridad. El a splica un tiki di e cambionan aki, esfuersonan cu nan a haci pa finalmente awe e cambio aki por tuma luga.

El a comenta cu tin cierto cambio awor aki mas tanto den trafico. E trafico eynan tabata tin un efecto hopi grandi. Hopi hende ta uza e pida banda di e kiosconan, strobando e hendenan traha eynan.

Tabata tin cierto cambio cu a haci pa por duna un miho servicio. A pone na entrada, un borchi di verboden cu excepcion di e busnan di tour, taxi y personal di waf. Esaki lo drenta na vigor dia 13 di Maart proximo. A duna tur hende un chens pa por custuma cu e situacion. A cambia hopi borchi, e parkinglot a bira solamente pa tourbus, taxi, etc. Solamente pa esnan cu tin toegang pa por drenta e waf.

A numera varios spot pa e personanan aki por traha a base di turno. Esnan cu ta para na number 1, segun uno schuif, nan ta keda bay dilanti, bin na dos. Pa tur hende tin e fair chance di traha nan placa di cada dia.

Apesar di esey a bin cu borchi di orario, cual cu nan no tin mag di laga e busnan eynan, pasobra esey tambe tabata tin un problema caminda cu e busnan tabata drumi eynan. Pa leynan internacional di crucero, no mag di tin nada staciona rond di entradanan di waf pa evita atakenan terorista, of algo asina.

A papia cu nan y nan a coopera. A dicidi toch di buta e ley, borchi cu por stipula mañan si hende para eynan, por actua contra dje. Si bin haya un di e busnan para eynan, nan ta bay cuminsa na haya un wegsleepregeling y un boet. Nan ta perde nan puesto tambe. Nan tin mag di para despues di 5’or di mainta. Entre 9’or di anochi y 5’or di mainta, no mag para ningun bus eynan. E ta conta mescos pa esnan cu ta uzando e parkinglot mas pabao, di auto particular. Tampoco no mag di para eyden mas.

Tabata tin problema tambe cu aglomeracion di auto den marduga, draaimento di taira, bebemento, nan ta laga sushedad atras. E borchi ey tambe lo evita e cosnan ey.

Si un patruya pasa y haya e autonan para eyden, nan por haya un proces verbaal.

Prohibicion

E borchi ta bisa verboden, cu excepcion di busnan di tour, taxi y personal di waf, 24 ora pa dia.

Otro cambio

Tin cambionan na caminda, pero Kock no por divulga tur cos pasobra nan ta den negociacion ainda. Si tin prijs stipula pa ley, pa e servicio di tour. Pero ta bezig den negociacionnan ainda. Den transcuro di e siman cu ta bin aki, por divulga poco mas riba esey. Ta purbando di structura di tal manera, cu tur hende tin e fair chance, traha nan placa trankil, sin tin conflicto entre nan.