Repasando e aña desde cu pandemia a dal Aruba, pa taxistanan esaki tabata un sla hopi duro. Nan tabata depende practicamente di turismo. Nan a keda un luna sin ningun entrada. Te fin di april a cuminsa haya ayudo financiero, Linda Orman, di Asociacion di Taxista, ta recorda e periodo aki.
E lockdown tabatin efecto grandi riba Aruba. “E tabata un periodo di hopi incertidumbre, no tabata sa kico ta bay pasa. Ora cu COVID a plama mas, no por a conclui otro cu e pandemia lo t’ey pa basta tempo. Mas ainda awo cu a bini d e variantenan tambe. Nos tin ainda un tempo dificil. E virus aki tabata un desaster economico cu a afecta henter mundo, Aruba, y esnan manera taxista cu ta depende di turismo.”
Pa taxistanan e recuperacion ta hopi slow y hopi di e taxistanan no ta riba caminda ainda, debi nan situacion di salud vulnerabel, y no kier pone famia na peligro. Ultimo simannan por a nota cu e casonan positivo di no-residente ta aumentando tambe. Esaki ta trece mas miedo bou di e taxistanan, di kico ta biniendo pa Aruba. E pregunta ta keda si ta bale la pena un fluho di hende ta drenta, aunke cu Aruba mester di e entrada aki. Mas ainda pasobra e aña’ki turismo crucero lo no habri y pa otro aña, te awo, di e seis barconan, solamente un lo tin despues di 27 di november.
Mayoria di e companianan crucero a cancela y otronan nota bay riba rutanan largo, mas si nan ta sali for di Miami. Esaki ta trece cu ne, cu ta bay uza rutanan mas cortico. Solamente esnan cu uza un homeport cerca di Aruba, lo por inclui nos isla den nan ruta. “Den turismo crucero nos a bay di Guatemala pa Guatepeor.”
