LIBERTAD TA… un programa cu ta wordo presenta pa Muchila Creativo, auspicia pa CEDE Aruba y Music Generations (Hulanda). Durante luna di November a presenta diferente tayer unda cu tanto hobennan como nos grandinan den ambiente ameno a bini hunto pa comparti nan storia y historia di nos dushi isla den combinacion cu Hulanda.
Durante e encuentronan hobennan a siña hopi di e experiencia y principalmente con fuerte e parti di nos norma y balornan tabata wordo ehecuta pa e mayornan.
Ta tin tayernan di contamento di storia y poesia, musica y e encuentro entre generacionnan.
Durante Art Fair por a sinti e emocion di e hobennan cu a experencia e tayernan y tambe e musiconan di Music Generations kendenan a bin Aruba specialmente pa e Proyecto aki. Despues di a pasa Corsow e grupo aki di musiconan a duna tayernan y presentacionnan na nos grandinan na San Nicolas, hobennan di scol EPB, y tambe hobennan den KIA.
Tabata un experiencia diferente y unico pa mira con tabata comparti experiencia, emocion y historia cu a wordo documenta. Libertad ta, ta un inicio di e celebracion di e 75 aña di e liberacion di segunda Guerra mundial unda nos Aruba tambe tabata forma parti di e historia aki. Pasado y presente a uni pa un Proyecto hopi bunita y cu nos ta spera cu lo por tin su repiticion.
E encuentronan durante tayernan di Libertad ta, a duna e contenido di su nificacion y esaki lo wordo poni den cancion, rap, hip hop y den contamento di storia.
Un projecto piloto cu diasabra awor lo tin su fase final, unda cu por medio di e artistanan bishitante di Music Generations, bou direccion di Paul Mayer un Hulandes/Sirio y beatboxer Haydar Al Corky, cantante Turko/Hulandes Aysegul Karaca conhuntamente cu cantante y compositor Lisa Roth lo ta hunto cu nos hobennan talentoso cu lo duna un presentacion final na e pueblo di Aruba. Evento lo cuminsa pa 7.30 di anochi na Centro di Bario Brazil cu tabata e cas di henter e projecto aki pa e luna di November, entrada pa e evento final ta gratis.
Danki sigur na henter e directiva di CB Brazil pa e ayudo ofreci na fundacion Muchila Creativo y tambe na Music Generations.
