Trahadonan di Hong Kong Supermarket na San Nicolas ta hopi preocupa cu nan futuro. Tin un incertidumbre grandi pa motibo cu e situacion di e supermercado ta bayendo malo y nan tin un luna sin haya nan salario.
E situacion di e supermercado ta alarmante y bayendo atras, y e trahadonan ta mirando cu freezernan ta birando bashi mientras cu no ta haci movecion pa yena nan bek. Inclusive cierto partinan a keda sin coriente, sin cu nan ta wordo drecha.
E empleadonan a aserca un persona, esta Rodrigo Tromp, pa mira con e por yuda nan. Loke cu Tromp a bin tende ta cu for di luna di september nan salarionan tabata wordo paga den pida pida. Su conseho tabata pa nan bay Departamento di Labor.
El a bisa cu tin hopi cos straño a sosode den e fase aki, unda cu un homber cu ta traha na Hong Kong Paradera, conoci como Baas, a bisa nan pa firma un documento cu nan ta retira y despues nan lo haya pago. Tromp a conseha nan pa no firma nada y keda presenta na trabou. Nan ta sinti cu ta un wega cu ta wordo haci cu nan. Ta manera cu gerencia ta spera nan cansa y tuma nan retiro.
Supuestamente nan ta mesun compania, pa cual kier pa nan bay Paradera pero sin paga loke cu debe nan. Departamento di Labor a haci e calculacion caba di loke gerencia of propietario mester paga e tres empleadonan, pero nan no tabata di acuerdo cu e suma y a bisa cu nan lo haci nan mesun calculo.
Tromp ta sinti cu Departamento di Labor por a informa e trahadonan hopi mas miho. Ta falta hopi mas splicacion, manera un carta pa nan haya un Abogado liber. Departamento di Labor ta papia so y no ta mustra e solucion.
