Gobierno a manda e ley pa privatisa RWZI parlamento y e conseho ta pa aumenta e impuesto di medio ambiente cu lo mester financia tur cos cu tin di haber cu e planta di RWZI. E planta aki ta bay pa Utilities Aruba cu lo crea un compania apart y mester paga riba 30 miyon florin pa esaki. Den un periodo di 60 aña.
Manera ta conoci, e planta di RWZI a surpasa su capacidad ya pa basta tempo caba. Turismo a crece, pero e capacidad di e planta no a crece. Varios gobierno a purba trece solucion pero no a logra. Durante pandemia, momento cu a cera frontera y no tabatin turista, por a nota cu e planta di RWZI a haya un alivio, pero mirando e crecemento grandi di e sector turistico, e planta no por sigui carga tur esaki y a cuminsa causa mas problema. Varios intento di Gobiernonan di Aruba pa inverti den e planta, cada biaha a encontra mas reto, mirando e situacion financiero di pais Aruba.
E planta ta causa molester den e vecindario y ultimo tempo e molester a aumenta aun mas. Esaki ta e motibo pakico ta asina urgente pa yega na un solucion pa e problema serio aki.
Ultimo aña gobierno a institui un stuurgroep den cual diferente ministerio tin representacion y cu a haya e tarea pa privatisa RWZI, cu ta mira como e unico solucion. E compania di utilidad a mustra disponibilidad pa tuma over e planta.
Den un relato cu gobierno a saca e siman aki, por lesa cu na september, 2023 a tuma e decision den Conseho di Minister pa traspasa e operacion y propiedad di RWZI (Bubali, Parkietenbos, Zeewijk), rioolstelsel y Incinerator pa un subsidiario cu Utilities a lanta. Indirectamente e compania lo ta 100% den man di Pais Aruba. E compania, Aruba Wastewater Sustainable Solutions NV (AWSS), ya a traha un businessplan, un plan strategico pa termino corto y largo con pa tuma e planta over y e documentacion ta cla pa destaho publico. A traha e plannan y documentonan hunto cu RoyalHaskoning y despues di traspaso mester cuminsa mira alivio mesora.
Pa relato amplio lesa TREMPAN.news
