Minister di Turismo y Salud Publico, Dangui Oduber, ta informa comunidad cu e resultadonan di turismo pa luna di maart 2024 a drenta. A demostra cu analisis den luna di maart 2024 cu un biaha mas e cifranan ta positivo pa nos economia.
Minister di Turismo y Salud Publico, Dangui Oduber, ta satisfecho cu luna di maart a cera cu resultado positivo. Maart 2024 a ricibi 141,380 bishitante cu a drenta Aruba cu un 25.8% den crecemento compara cu e mesun luna di 2023.
Aruba ta keda un destinacion precioso pa hopi bishitante den Caribe. E turistanan ta keda satisfecho cu Aruba y ta clasifica e “Guest experience” cu un 9.0. E tres categorianan cu ta mas miho clasifica ta: ambiente cu 9.6, localidad cu 9.5 y food & beverage cu 9.4.
Den 2023 Aruba Tourism Authority (ATA) a cuminsa midi e impacto economico di “short term rentals.” Ta midi e impacto aki cu Average Daily Rate (ADR) cu ta na $296 y Occupancy Rate cu ta na 70.1% cu un entrada di $22,856.992 pa e luna di maart 2024.
Minister Oduber ta remarca cu e top 3 plataforma di Vacation Rentals na Aruba ta Airbnb, Booking.com y VRBO. Ta pa menciona cu Airbnb tin e mercado mas grandi di “listings” y “occupancy” di vacation rentals creciendo den ful Caribe.
Pa conclui, Minister Dangui Oduber ta satisfecho cu Aruba keto bay tin e cifranan halto cu ta demostra e bon maneho. Considerando e performance den luna di maart 2024 nos por conclui cu tin un crecemento positivo y stabiel di e turistanan cu ta biniendo Aruba. Minister Oduber kier a gradici tur partnernan, A.T.A., A.A.A., A.P.A., AHATA, ATSA y Aruba vacation rentals pa e resultadonan positivo aki. Sin lubida nos hendenan y e siguridad cu nos ta brinda na nos bishitantenan.
