Diasabra, den oranan di merdia, polis tabata necesario pa atende cu algun turista cu a bira victima di ladronicia riba e auto cu nan a huur.
Esaki tabata na Caribbean Palm Village. Polis di Noord a presenta y a topa cu un pareha turista di edad halto, cu a splica nan cu banda di 10’or di anochi, nan a yega hotel diabierna, y mainta, banda di 11’or y mey, ora cu nan a sali pa asina bay subi auto, pa bay dal un buelta cu nan auto V-3003, nan a mira cu den e front di e auto, no ta bon. Ta manera gedal of falta piesa, etc.
Mesora a bati alarma y a resulta cu para eynan, e auto a wordo desmantela. A horta luz robes. A kita full e sistema di luz, corta waya, kita cabes di bateria. Probablemente kier a horta mas cos di e auto. Nan lo a wordo stroba. Tur cos ta mustra cu e intencion ta pa horta mas cos di e auto. Ta trata aki di un auto MG, color di oro. Polis a tuma nan declaracion. Personal di e compania di auto tabata tey. Nan a atende tambe cu e turista. Turista tabata kier a haya un auto pa sigui move. Pero ta wak’e scur. Door cu ta hopi druk y no tabata tin auto di spare den e dianan aki. Lo bay wak con ta bay soluciona problema di e turista.
Mientras tanto e turista, su seguro no ta cubri ladronicia. Esey ta nifica cu e tin cu bay saca basta placa pa cubri e piesanan cu a wordo horta di e auto cu el a huur.
Sigur un situacion fastioso. Cuerpo tecnico di polis a wordo avisa, pasobra cu tin hopi fingerprint riba e hood di e auto y kisas esey por yuda pa evidencia, si yega na e ladron.
A keda di check camara tambe cu tin den e parkinglot, pa mira si por haya kende ta esun cu a comete ladronicia riba e auto, entre 10’or di anochi y 11’or y mey di mainta.
