Pa aña ta existi e situacion di e kiosconan riba e boulevard di sector hotelero. Na diferente ocasion a bisa cu lo bay haci algo cu e situacion, pero nunca a yega asina leu. Y awo e caso a yega te den corte. Ta resulta cu e mesun compania cu a brinda e situacion pa e kiosconan existi, awo kier hala nan for di e sitio.
Rond di aña 2011 a crea un situacion cu no a cay mucho na agrado di diferente instancia. Un cortina di kiosco riba acera dilanti pleno bista di e hotelnan grandi, dilanti di La Hacienda. Segun por a compronde, a haci uzo di un formula unda cu propietario di e compleho comercial tabata huur e tentnan / kiosconan cu el a cumpra cu diescinco mini comerciante y tabata cobra cada un e suma di dos mil florin pa luna.
Aki ta caminda e confusion a surgi ora cu diripiente nada menos cu diescinco kiosco a lanta pia riba e area ey. Ken a duna permiso? E mini empresarionan aki tabata bou di e impresion cu e kiosconan riba e acera ta e huur cu nan tabata paga pa tur cos, incluso awa y coriente.
Na aña 2011 gobierno a dicidi di manda un carta pa tur e mini comerciantenan aki y tambe propietario(nan) di La Hacienda cu esunnan cu ta opera riba e acera mester pidi un precario vergunning y esaki ta gobierno por dun’e, pasobra ta tereno di gobierno.
A dicidi di cambia e situacion y loke e hendenan tabata paga e ora tabata pa e tent y uzo di utilidad. Pero na 2018 ora cu Otmar Oduber a bira minister, a dicidi di bini cu un plan pa caba cu tur e tipo di situacionnan aki, unda cu mester pidi un precario y a informa cu tereno ta di gobierno.
Sinembargo, awo e doño a dicidi di bay Corte pa pidi pa ordena gobierno kita tur e negoshinan aki for di riba tereno di gobierno. Esaki pa motibo cu mester di e area ey pa construi un bar / cocktail lounge.
Dia 4 di october awo tin decision den e caso aki.
Pa mas lesa TREMPAN.COM.
