Diasabra ultimo, 9 di september, e desenlace final di e prestigioso copa di biyar bola 8 pa 60 plus, titula Jani Brokke Memorial Tournament, a tuma luga n’e palacio di biyar na Tanki Leendert. Un desenlace cu mester bisa a bay n’un forma dramatico, espectacular, y sensacional.
Na cuminsamento di anochi tabata falta ainda pa pone algun “puntjes op de i” prome cu e gran final mes por a cuminsa. Den loser’s round, dos legendario, Edwin “Kwek” Chirino y Buchi Briezen,a topa otro. Buchi a ripara cu su tanki di gasolin marca “di nos e ta” tabata falta net algun galon mas, y Kwek a probecha pa pasa p’e siguiente rondo. Siguientemente, Kwek Chirino a topa cu nada menos otro djaka di caña, “Sneaky” Sheik Orman kende a caba di manda subcampeon 2022, Junini Quant, cas. Kwek a demostra caliber legendario y a manda Sheik bek p’e santo di Sahara.
Den winner’s round, Patrick Henriquez a sinta warda comodamente riba su contrincante p’e final. Esaki tabata sea Kwek Chirino of Gino “Beton” Geerman. Den un wega sumamente emocionante, Kwek Chirino a haci un “slippertje” net na mal momento riba e bola 8! Publico a bay laira c’un grito di “no puede ser”! Gino mes no por a kere, pero ya, esey ta haci biyar e deporte mas cruel na mundo. C’un bon tiro, Gino a sink bola 8 y duna Kwek su ontslagbrief op staande voet!
Ban p’e gran final entre Gino “Concret” Geerman contra Patrick “The Silent Killer” Henriquez! Den un forma convincente, Gino Geerman a piki 1-0 dilanti, pero locual a bin despues ni na Hollywood nan por a pensa. E palacio di biyar a bira keto keto, y leu a leu bo tabata tende un fluistermento “sssst … ssst… Capoti … e ta bay dun’e Capoti.”
Patrick Henriquez den un Zen Zone total a pasa Gino Geerman un Capoti. Ban p’e rack decisivo! Aki no a dura mucho cu e luga a bolbe cay den un silencio di incredibilidad y e murmuronan “ssssst! Di dos capoti… e ta bay dun’e un capoti mas!” a cuminsa zweef rond “in de wandelgangen”! Boedoem! E bola 8 ta sink y Gino y ful publico no por kere … Patrick Henriquez a pasa legendario Gino Geerman, campeon 2022, dos capoti tras di otro! Na un forma convincente, Patrick a demostra pakico nan ta yam’e “The Silent Killer”! Un tremendo y espectacular final p’e prestigioso torneo “Jani Brokke Memorial 2023” biyar bola 8 pa 60 plussers. Ora a puntra Patrick ta con e por a logra un hazaña asina bou e presion enorme ey, el a contesta cu pa basta tempo el a siña hala rosea mescos c’un Cabayero Jedi di Star Wars, y cu tambe e ta bezig ta siñando con pa uza “The Force” ora e posicion dje bolanan mester “schuif” un tiki.
Shonnan, keda pendiente, otro aña ta bay tin “carni nobo” den e grupo di 60 plus! Un danki grandi na e organisado Movemento ta Bida, y te otro aña.
