Diaranson tabata un dia importante caminda cu kustwacht oficialmente a introduci nan botonan nobo, esta e botonan Metalshark.
Segun Randy Paskel di punto di sosten di kustwacht na Aruba, nan tey pa algun tempo caba. A pasa den un fase di training y oficialmente diaranson a pone nan den servicio di kustwacht.
Pa e hecho aki a tene un celebracion chikito y expone nan na miembronan di prensa y tambe na nan invitadonan.
Prome reaccion
E prome reaccion tabata hopi positivo, mirando cu kustwacht tabata tin un rol den escogencia di e botonan aki. Ta un plan cu a bin ta concretisando di algun aña caba. Sigur ta un adelanto grandi pa e personal, pa nan siguridad y en todo caso pa e efectividad riba lama tambe.
Diferencia den boto
E diferencia entre Metalshark y e Super Rhibnan, ta e proteccion pa loke ta e personal ta hopi mas grandi. Ta trata aki di un cabina cera. Una bes cu nan subi lama, nan no lo ta exponi ni na awa, na biento. Nan lo ta proteha. E ekiponan cu tin riba dje tambe, ta hopi mas avansa. Kustwacht a dal un paso hopi grandi den tecnologia, pa loke ta ekiponan di deteccion. E motornan ta di potencia hopi mas grandi y e botonan aki tin un durabilidad mas grandi.
Lama di Aruba
Actualmente tin dos siman ta train cu e botonan aki. A pasa den tur e awanan bruto di Aruba. El a pasa cu hopi bon resultado, segun Paskel. El a prueba su mes cu e speed cu kustwacht a desea. Loke nan a pidi ta loke nan a haya. Personal di kustwacht ta hopi contento. Ta den contacto ainda cu e compania cu a construi e Metalshark, unda cu ta haciendo e ultimo ahustenan.
Semper ora un boto nobo bin, tin cierto ahustenan cu tin cu tuma luga.
Super Rhib
Ainda e super Rhibnan ta den servicio. Lo mantene nan pa algun siman hunto cu e Metalsharknan. Una bes cu nan ta full operacional cu e Metalsharknan, lo tuma despedida tambe di e Super Rhibnan.
