Den e region aki tin basta problema cu Venezuela. Tur hende ta pensa riba Marinierskazerne cada biaha pa defensa. Segun Timon van Dishoeck, comandante di Marinierskazerne na Savaneta, mucho e no por bisa, pasobra tin cierto plannan nan no kier haci nan publico.
Si el a bisa cu semper nan ta prepara pa bay den accion. Na Hulanda tin plannan traha pa cualkier eventualidad. Aumento di refugiadonan entre otro. Tin e servicionan di informacion hunto cu e Departamento di Siguridad di Aruba, pa tene un vigilancia riba tur cos.
Pa awor aki, regularmente Marinierskazerne hunto cu Siguridad Nacional. E ora ta papia cu Hulanda riba e asuntonan cu ta toca e region. No solamente pa Aruba, pero tambe pa Corsou, St. Maarten y e demas islanan di Reino.
E ayudo cu Hulanda lo por brinda, ta depende ki tipo di ayudo tin mester. Prome cos ta e responsabilidad, si Aruba tin mester di ayudo, e ora semper nan por pidi. Pero si en berdad e forsanan arma mester cay aden, e ora esey lo sosode solamente si Venezuela mester ataca Aruba. E ora lo ta un caso di defensa.
Otro casonan, ta e responsabilidad di Aruba mes, pa loke ta imigracion, pa loke ta yegada di ilegalnan via costa. E responsabilidad ey ta keda cerca Kustwacht, cerca polis y husticia.
Aruba por pidi semper pa ayudo. Esey ta loke Hulanda ta bisa, como tambe e comandante ta bisa durante su combersacionnan cu e Alto Comisario di Polis y tambe gobierno.
Pero awo tin cu traha segun ordo y no por tuma tur accion independiente, e ora nos ta biba den un otro sorto di pais.
Extra personal
Pa e situacion aki no a pidi pa extra personal. Tabata tin un mensahe riba Whatsapp cu a circula unda cu defensa lo ta para cla pa cualkier invasion. Pero segun van Dishoeck, e noticia cu a circula no ta berdad. E mes por a mira e mensahe eynan. Tabata tin hende extra pero esaki ta un entrenamento cu tabata tin, cual no ta peculiar.
Si mester bin refuerso, e ora Hulanda rapidamente lo mobilisa. A haci esaki durante horcan Irma. Cu 80 militar nan tabata na St. Maarten y den menos di 10 dia, di 80 hende, nan a bira 800, pa asina yuda cu e situacion na St. Maarten.
Tarea
E tarea di van Dishoeck, ta defensa militar. Nan por yuda kustwacht y polis riba peticion di gobierno, pero pa nan tene hende pafo di Aruba, no ta su trabao. Gobernador semper tin un papel den e proceso aki. E peticion mester wordo formula pa gobierno. Gobierno ta haci e preguntanan na gobernador y e gobernador ta haci e peticion e ora na Hulanda.
Pa algun cos, a regla cu gobierno por pidi General de Vinck pa sosten, cual ta cuater cos. Pa Buskeda, si mester listra varios obheto, pa duik tambe, entre otro, segun van Dishoeck.
Un cos si, constantemente nan ta sigui e ultimo desaroyonan di Venezuela. Esey ta sigur.
